Osejele ubhale incwadi ekhuluma ngempilo yakhe
UFUNA ukusiza abanye abangene ezinkingeni zobugebengu owesilisa obhale incwadi ngempilo yakhe esejele.
UNhlakanipho Sikobi waseMargate ubhale incwadi ethi “You Are Born To Win” ekhuluma ngempilo nokungena ebugebengwini esemncane.
USikobi uthe uqale ukungena ejele eneminyaka engu-13 ngecala lokugqekeza nokweba. Eqala ukuboshwa wagwetshwa iminyaka emithathu wagwetshelwa ngaphandle ngoba kuthiwa kufanele ahlale nabazali bakhe. Lokhu kube yisiqalo sempilo yokungena ephuma ejele.
“Ngiphinde ngaboshwa ngonyaka olandelayo sengiboshelwa ukuntshontsha izimpahla ezazibiza kunalezo engangizintshontshile. Ngibe sengibuyela ejele kaningi emuva kwalokho okungangokuthi ejele kwase kufana nendawo yokuvakasha kimi,” kusho uSikobi.
Kumanje udonsa iminyaka engu-12 ejele eliseBarberton, eMpumalanga ngamacala ahlukene okubalwa kuwo awokugqekeza nokweba emuva kokugwetshwa ngo-2008.
Uthe ngo-2014 uqoke ukubhala incwadi ekhuluma ngezimo adlule kuzona ikakhulu emuva kokuthi ethole ukuthi unegciwane lengculazi. Uthe ukuthola ukuthi unaleli gciwane kumenze wafisa ukusebenzisa zonke izimo abhekane nazo ukukhuthaza abanye abantu abasha. USikobi uthe ubefuna nokuthi baqonde ukuthi impilo yobugebengu inemiphumela engemihle. Uthe encwadini yakhe ukubeka kucace konke adlula kukhona nezinkinga agcine esebhekene nazo ngenxa yezinqumo azithatha.
“Ngichithe isikhathi eside ngingenahlelo lwempilo olucacile futhi ngiphila impilo engamanga. Ukuboshwa kwami kwadalwa ukuthi ngizihlanganise nabantu abangalungile,” kusho uSikobi.
Uthe okunye akugqamisayo encwadini yakhe ubudlelwane bakhe noNkulunkulu athe ubuqale emuva kokuhlala isikhathi eside engena ephuma ejele.
Okwamanje incwadi isatholakala ezitolo okuthengwa kuzo nge-internet.