Okubalulekile yimpumelelo yeqembu: Vilakazi
UMDLALI wasesiswini weMamelodi Sundowns, uSibusiso “Villa” Vilakazi, ubeka phambili ukufaka isandla empumelelweni yeqembu kunokuzihlupha ngokubuyela efomini aziwa ngayo.
UVilakazi usayine kwiSundowns ekuqaleni kwesizini ka-2016/2017 esuka kwiBidvest Wits. IZitshudeni zisale zawina isicoco se-Absa Premiership. Selokhu efikile kwiSundowns kunezikhalo ngezinga lakhe elingasafani nalelo ayekulo ekwiWits nalapho ewine khona umklomelo we-Absa Premiership Player of The Season.
Umqeqeshi weSundowns, uPitso Mosimane, usekusho kaningi ukuthi nakuba uVilakazi engakabuyeli ezingeni amazi ngalo kodwa kubalulekile ukumeseka ngoba wenza iqembu lidlale ikakhulukazi uma izinto zingalihambeli kahle.
UVilakazi ukhombisile ukuthi usengabalwa nabadlali abaphezulu kwiPremiership ngesikhathi eshaya ingcwenga yegoli bebhubhudla iPlatinum Stars ngo 3-1 emasontweni adlule.
“Ngizama ukuba ngcono umdlalo nomdlalo nethuba lokuba sensimini engilitholayo. Ngenze umsebenzi olindelekile. Okubalulekile kimina wukufaka isandla empumelelweni yeqembu kunokuzibheka mina,” kusho uVilakazi.
“Ukuzethemba bekuhlale kukhona. Umfutho wokuzama ukubuyela ezingeni lami ngihlale nginawo. Kuwona wonke umdlalo ngihlala ngifuna ukuba ngcono. Okubalulekile wukuzama ukusiza iqembu.Ngiyabonga ukwesekwa ngumqeqeshi, akuyena yedwa kodwa nephini lakhe nozakwethu. Ngizama ngakho konke ukuthi ngikukhombise lokho njalo uma nginikwa ithuba.” ISundowns isazihola phambili kwi-log yePremiership ngamaphuzu awu-36 emuva kwemidlalo ewu20. Ayikaze iwine neyokubika indebe kule sizini ka-2017/2018. AmaBrazilians azoqala umkhankaso wokuwina iNedbank Cup uma esevakashela iCape Town All Stars edlala kwiNational First Division (NFD) emdlalweni weLast 32 e-Athlone Stadium eKapa kusasa ngo-8 ebusuku.
Umdlalo uMosimane uzowubuka nezihlwele ngoba ukhonjwe indlela ngunompempe uVictor Gomes koweligi behlula iCape Town City emuva kokuthi ekhononde ngesinqumo sakhe. Ebhentshini kuzohlala iphini uManqoba Mngqithi noWendell Robinson owayevimbela iMoroka Swallows nobuye aqeqeshe onozinti kwiSundowns.
“Kufanele sizilungiselele kahle ngaphambi kwalo mdlalo. Nginesiqiniseko sokuthi uzoba nzima. Sidlala neqembu eligqugquzelekile, elifuna ukuziveza futhi lidlalela ekhaya. Wumdlalo womkhumulajezi, yithuba lethu lokuzibona ukuthi singahamba ibanga elingakanani,” kusho uVilakazi.