UJobodwana ubambe umoya ngokulimala
UTHANDAZELA ukuthi angabi nayo inkinga yokulimala kulo nyaka umgijimi waseNingizimu Afrika, u-Anaso Jobodwana, ophuthwe amaWorld Championship eLondon nyakenye ngenxa yakho.
UJobodwana uzogijima u-200m kwi-Athletix Grand Prix ezoba seRuimsig Stadium ngoMashi 1. Ukulimala lokhu yikhona okuphinde kwamvalela ithuba lokuya kumaCommonwealth Games aseGold Coast e-Australia ngo-Ephreli.
Into aseyifisa wukuthi kungabi khona okumphazamisayo ukuze akwazi ukuba seqenjini elizoya kwiCAA Senior African Championship eNigeria ngoAgasti.
“Ayikho into emnandi njengokugijima ngaphandle kokuhlushwa wukulimala. Manje nginesikhathi esanele sokulungisa indlela engijima ngayo ngokuthi ngibe semincintiswaneni eqinile.
Umjaho we-Athletix Grand Prix uyindawo enhle yokwenza lokho,” kusho uJobodwana esitatimendeni esikhishwe i-Athletics South Africa.
Uthe inhloso yakhe enkulu wukubuyisa irekhodi lakuleli lika-200m njengamanje eliphethwe uWayde van Niekerk elingu-19.84.
UJobodwana yena wayeliphule ngo-2015 elibeka ku-19.87 ngesikhathi ethola indondo yethusi kumaWorld Championship eBeijing China.
“Ngiyazi ukuthi uma ngiqala ukuphula u-10:00 ku-100m ngizokwazi ukushaya isikhathi esingcono ku-200m ngibuyise irekhodi lami. Ukugijima kwiGrand Prix kuhambisana kahle impela nezinhlelo zami njengoba ngifuna ukubuyela ekugijimeni izikhathi ezinhle ngokukhululeka,” kusho uJobodwana.
UVan Niekerk yena usalulama ngemuva kokuyohlinzwa edolweni ngoDisemba. KwiGrand Prix uJobodwana uzoncintisana noRetshidisitswe Mlenga ozakhele igama enqoba isicoco somhlaba sika-200m kumaWorld Championship eNairobi, eKenya nyakenye.
Lo mgijimi oseneminyaka engu-17 ubuye wahlomula ngesilva ku-100m.
Ngemuva komjaho waseRuimsig, umlenze olandelayo uzokuba seTuks Stadium ngoMashi 8 bese kuba osePaarl ngoMashi 28. Amathikithi azotholakala emasangweni ebiza phakathi kuka-R50 no-R100.