Lusesibhedlela uqweqwe lomqeqeshi
IPHUTHUNYISWE esibhedlela ingwazi yomqeqeshi uKenny Ndlazi owayeseqenjini lika-Under 23 eladlala kuma-Olympic Games eSydney, e-Australia ngo-2000.
UNdlazi (65) owuqweqwe lomqeqeshi usecija iHappy Wanderers egijima kwi-ABC Motsepe League KwaZulu-Natal. Leli qembu lizodudulana neRoyal Eagles eSugar Ray Xulu Stadium, eClermont ngeSonto ngo-3 ntambama.
Lezi zindaba ziqinisekiswe nguPhumlani Ndwandwe oyiphini likaNdlazi ngesikhathi ehambele isithangami nabezindaba ngaphambi komdlalo wabo ne-Eagles ngeSonto ngo-3 ntambama.
“Ngebhadi-ke umqeqeshi akazange akwazi ukuba yingxenye yeqembu namuhla ngoba uzizwa ebuthaka okuphoqe ukuthi simphuthumise kudokotela oyalele ukuthi alaliswe esibhedlela. Siyaxolisa kakhulu ngokufika kulesi sithangami sekudlule isikhathi,” kusho uNdwandwe.
UNdlazi useke wagila izimanga kulo mqhudelwano ngo-2008. Wafinyelela kowamanqamu walo mqhudelwano neMpumalanga Black Aces. Wagcina ethelwe othulini yiMamelodi Sundowns ngo 1-0 wegoli likaLerato Chabangu.
Ngesizini edlule iqembu laseKZN elidlala kwiMotsepe League iKwaDukuza United lenze kakhulu kwiNedbank Cup. KwiLast 32 yeNedbank Cup leli qembu liguqise i-Ajax Cape Town kwathi kwiLast 16 lathwalisa kanzima ompetha iSuperSport United.
“Lona ngumdlalo omkhulu kithina. Kuzoba yisipiliyoni esimnandi ukudlala namaqembu amakhulu. I-Eagles sizoyinika umdlalo oshubile. Lapha sizinze khona e-Margate ayikho inkundla esesimeni sokusingatha imidlalo yalolu hlobo. Yingakho siphoqelekile ukuthi sibheke enye inkundla esingadlalela kuyona. Besingakaze sijimele eSugar Ray Xulu kodwa sikulangazelele ukujima khona kusasa (namuhla). Angicabangi ukuthi sinengcindezi ngenxa yokwenza kahle kweKwaDukuza ngesizini edlule. Ukwenza kahle kusize bona. Thina sizoya emdlalweni ngenhloso yokuyozijabulisa,” kusho uNdwandwe.