‘Bazokhapha’ uDanny kolweSafa
LULOKHU lukhule njalo uhla lwamagama abantu abaziwayo eNingizimu Afrika abaphakanyiswa yizinhlaka ezahlukene ukuba babangise uDanny Jordaan kwesokwengamela iSouth African Football Association (Safa) okhethweni oluzokuba ngoMashi 24.
Kulona lolu luhla kukhona owayengumqeqeshi weBafana Bafana, u-Ephraim “Shakes” Mashaba, okuvela ukuthi uphakanyiswe yiSouth African Masters and Legends Football Association (SAMLFA) eseGauteng. Nakuba kunjalo kodwa imibiko yayizolo iveze ukuthi iSAMLFA izwakalise ukwethuka ngokuphakanyiswa kukaMashaba ngoba yona yazi ukuthi nguJordaan ozophakanyiswa.
UMashaba ukhonjwe indlela kwiSafa ngoDisemba ka-2016 ngemuva kokuvuka indlobane agxeke bukhoma abaqashi bakhe ebasola ngokungamethembi.
Ngaphandle kukaMashaba okhonjwe indlela nguyena uJordaan asephakanyiswe ukuba abange naye, kukhona uNakedi Lekota owake waba sesigungwini esiphezulu seSafa, owayeyiphini likamengameli layo iSafa inkosi Mwelo Nonkonyana, usomabhizinisi futhi okwipolitiki uTokyo Sexwale, owayengunondweba ohlonishywa kwiPremier Soccer League (PSL) u-Ace Ncobo nokaputeni wakudala weBafana uLucas Radebe.
Umthombo weSolezwe ongaphakathi kwiSafa utshele leli phephandaba ukuthi bonke laba abaphakanyisiwe bazidlalela ngesikhathi nje.
“Ake uzibuze ukuthi kungani laba abaphakanyisiwe bengavezi ukuthi ngobani ababafuna kulesi sikhundla. Kungani kube yimfihlo lokho? Yingoba bayazi ukuthi ekugcineni bazophoxeka sekucaca ukuthi umthethosisekelo wokungenela lolu khetho uyabachitha. Kumele usebenze okungenani iminyaka eyishumi emazingeni aphansi kumbe ezinhlakeni ezisezansi zeSafa ukuze ungenele ukhetho lokuba ngumengameli. Kubona bonke ababalwayo, uJordaan kuphela onezimfanelo eziyizona,” usho kanje umthombo.
Uqhuba uthi kuzothi uma sekuvaliwe ukuthi kuphakanyiswe amagama abantu bese (lawo magama) ethathwa eyiswa kumcwaningimabhuku okuyilapho kuzofike kuvele khona konke.
“Ungakhohlwa ukuthi la magama azoyiswa kumcwaningi nje, kuzobe sekuvaliwe ukuphakanyiswa kwamagama bese uJordaan ezihambela yedwa.
Lokhu angikusho ngoba ngithanda uJordaan kepha yiyona into ezokwenzeka. Naye uJordaan unokwakhe kodwa ngiyokunabela kahle ngelinye ilanga,” usonge kanje umthombo wethu.
UDominic Chimhavi okhulumela iSafa uthe: “Ngingakuqinisekisa ukuthi kuyavalwa ukuthathwa