Indandatho ayibophi imizwa yobuntombi ekowesimame
IZINKINGA eziningi zidalwa wukuthi awasekho amakhehla nezalukazi ezidlulisela ulwazi kubantu abasha ukuze bakwazi ukubhekana nezinkinga. Ukungabikho kwabantu abadala abanalolu lwazi yikhona osekuholela ekutheni abantu baholwe oVolos abangamakhehla otshwala.
MaSolezwe ngifisa nazi ukuthi anginendaba noma ningathi ngikhulunyiswa wutshwala kodwa ngifuna ukunichazela ukuthi kungani amadoda amaningi etholoza emajele ngenxa yokuthi ahlukumeze abantu besifazane abashade nawo. Kuyiqiniso ukuthi imishado yesimanje iwubukhazikhazi obukhulu kuze kugitshelwe namabhanoyi kuchithwa imali kodwa isiphetho kuba yidivosi, kujahwane ngezibhamu. Namuhla okaVolos ufisa ukunazisa ukuthi le nsimbi efakwa emnweni okuthiwa yindandatho ayakhelwanga ukuthi ibophe imizwa yobuntombi ekumuntu wesifazane.
Amadoda kufanele aqonde ukuthi indandatho yomshado ayimkhiphi umuntu wesifazane ubuntombi, kuyenzeka umuntu wesifazane ashade kodwa usinga lobuntombi lungaphumi egazini lakhe.
Amadoda esimanjemanje adukelwe yiqiniso lokuthi kusukela emandulo umuntu wesifazane wayekhishwa ebuntombini afakwe ebufazini. Amadoda empucuko aganwa umfazi aqede ambuke azitshele ukuthi uzozingenela ezigabeni zokuba yinkosikazi eqotho.
Umbuzo okufanele ngiwuphendule ngothi umuntu wesifazane ukhishwa kanjani ubuntombi afakwe ubufazi egazini lakhe? Impendulo ithi kudala umuzi nomuzi wabe unomuthi wokwelapha omakoti abaganele kulowo muzi ngoba kwakwaziwa ukuthi kungenzeka bavukwe ubuntombi sebeganile uma bengakhishishwanga ubuntombi ngemithi ethithibalisa imizwa.
Amadoda esimanje akholewa olakeni lokuthi bathethise abantu besifazane ngethemba lokuthi bazokwethuka kuphele imizwa yobuntombi abadalwe nayo. MaSolezwe okaVolos uyaphinda uyagcizelela ukuthi akusoze kwasiza ngalutho ukuthi indoda iqulise umuntu wesifazane amacala kodwa ibe ingamelaphile ngemithi yokumenza afise yona yodwa. Ngikusho lokhu ngiqonda kahle ukuthi amadoda esimanje akukhonzile ukuneka izandla athi wona awayazi imithi yokuqinisa abafazi. Impendulo ithi bakhona abantu abafana noVVO Mkhize noMhlongo nabanye onogobela abanolwazi lokuthi yimiphi imithi okufanele idliswe owesifazane oseganile ukuze kuphele umuzwa wobuntombi.
Umuntu wesifazane olashiwe ngemithi yokumubethela akefani nowesifazane ongabetheliwe owenza izinto ngekhanda lakhe efuqwa inhliziyo yakhe. Obetheliwe akagcini ngokuthanda indoda yakhe kodwa uthanda ngisho izihlahla ezimile egcekeni lalapho eganele khona. Kwala ngisho indoda abeyiganile seyishonile kodwa angeke umuzwe esethi uyabaleka ubuyela kubo.
Le nto engikhuluma ngayo uyibona kahle komama abasizalayo nogogo bethu othola ukuthi balokhu bagana abakaze bashintshe ngisho sekwashona amadoda ababewaganile. Uma ukhuluma indaba yokuthi ufuna kushintshwe inxiwa kuyokwakhiwa kwenye indawo bakuhebeza ngokushesha bathi abakwazi ukusuka bashiye amathuna amadoda abawaganile. Lokhu kungubufakazi bokuthi uma umuntu wesifazane ebethelwe kahle ngemithi enembayo ugana ingunaphakade aze aphenduke umagana ithuna uma indoda yakhe isishonile.
MaSolezwe ngivumeleni ngingachazi ukuthi indoda ibethelwa kanjani ngoba sengake ngachaza phambilini kodwa ngiyathanda ukukhumbuza abesifazane bazi ukuthi ikhona imithi yokukhipha ubunsizwa endodeni. Uma owesifazane engayelaphi indoda yakhe ayikhiphe ebunsizweni kufanele akulindele ukuthi uyohlezi evika izagila zezintombi ezifuna ukuzogana zikhiphe yena.