Ulaxaze imenenja yakhe uBilliat
ISIBABULI somdlali weMamelodi Sundowns, uKhama Billiat, silaxaze imenenja yaso uSiyabulela Loyilane ngemuva kokuthi ihluleke yancama wukusitholela iqembu phesheya kwezilwandle njengoba bekuvulwe iwindi lokuhwebelana ngabadlali.
Isolezwe lithole lezi zindaba ngesikhathi lixoxa noLoyilane.
“Angisasebenzi noKhama. Sihlukane naye ezinsukwini ezimbalwa ezedlule. Imbangela yokuhlukana kwethu idalwe wukuthi akakwazanga ukuthola iqembu elisha. Ngiyama-ke lapho ngoba angizimisele ngokukhuluma okunye okungaphezu kwalokhu esingikunike kona ngoKhama. Okunye okuphathelene noKhama akusangithinti mina,” kusho uLoyilane.
Inkontileka kaBilliat neSundowns iyaphela ngoJuni. Lo mdlali usenelungelo lokusayina inkontileka yesibambiso neqembu alithandayo ngoba imithetho yeFifa iyamvumela ukwenza lokho.
UBilliat akakayivuseleli inkontileka yakhe neSundowns. Isifiso sakhe wukuyodlala phesheya kwezilwandle. Bekuvela ukuthi ufunwa yizinkunzi zase-Egypt, i-Al Ahly neZamalek, ne-Al Nassri yaseSaudi Arabia. Uke wamataniswa neKaizer Chiefs ne-Orlando Pirates kodwa uLoyilane wayichitha leyo esasebenza noBilliat.
NgoMsombuluko kusabalale izithombe zikaBilliat egqoke imifaniswano yeDjurgardens yaseSweden. UThulani Thuswa wezoxhumana kuBafana Ba Style ebuzwa ngalo mfaniswano obusabalele uthe: “Yisithombe esingumbombayi leso. IDjurgarderns yiqembu esinobudlelwano obuhle nalo. Sabadayisela uNyasha Mushekwi kumasizini edlule ngakho sinazo izingcingo zabo. Sixhumanile nabo bathi isithombe singumbombayi.”
UBilliat kungenzeka agcine ehamba mahhala uma sekuphela inkontileka yakhe ngoJuni. Kulezi zinsuku usefomini enhle kwiDowns. Kuleli qembu ufike ngo-2013 esuka kwi-Ajax Cape Town. KwiSundowns usezinqobe zonke izicoco ezimqoka okubalwa kuzona iCAF Champions League, Absa Premiership neNedbank Cup.