OweBucs ulandula eyamagqubu
UMQEQESHI we-Orlando Pirates, uMilutin “Micho” Sredojevic, ubona sekufanele leli qembu liyeke ukuthi lisabeka isisekelo kodwa liqale likhombise ukuthi likhulu eNingizimu Afrika.
UMicho ufike kwiPirates ekuqaleni kwesizini enengcindezi yokushintsha izinto eqenjini elingawinanga neyokubika indebe ngedlule. Ezinguqukweni ezenzekile eqenjini kubalwa ukuhamba kukakaputeni u-Oupa Manyisa oseyibamba kwiMamelodi Sundowns nokusayiniswa kwabadlali abasha. USredojevic ubehlale etshela abezindaba ukuthi iqembu lakhe usalakha.
“Inqubekela phambili ayihlale ibheke phambili ngaso sonke isikhathi. Sesidlulile manje ekutheni sisabeka isisekelo esakhela phezu kwaso iqembu. Kufanele sibuyele ezingeni lapho sizophatha khona imidlalo njengeqembu elikhulu. Ukuphatha imidlalo yikhona esikubeke phambili manje. Sijabule ngesesikuzuzile kodwa hhayi ngendlela iqembu elithuthuka ngayo ngoba lokho besifuna kwenzeke ngokushesha,” kusho uSredojevic. “Siyajabula ukuthi abalandeli bayawubona umsebenzi esiwenzayo. Sizizwa simelwe wumsebenzi onzima wokubajabulisa, sibanikeze okubafanele. Ngicabanga ukuthi bafuna ukuwina ukubadlula bonke e-Afrika.”
I-Pirates izokwamukela i-Ajax Cape Town emdlalweni weLast 16 yeNedbank Cup e-Orlando Stadium kusasa ngo-8 ebusuku. Ngesonto eledlule eZimnyama zikhale ngaphansi kwi-Urban Warriors ngo 3-0 emdlalweni wePremiership.
Kulo mdlalo iPirates idlale isifake isimangalo ngokudlaliswa kobengumgadli wayo uTendai Ndoro osedlalele amaqembu amathathu ngesizini eyodwa. I-Ajax iqeqeshwa ngumngani omkhulu kaMicho, Muhsin Ertugral, obukeka ezophumelela ekuvikiseni izembe leli qembu.
“Asiyibambele igqubu i-Ajax. Ngikhumbula esinye isehlakalo lapho iSundowns yawina inqwaba yezindebe kodwa yaxetshulwa yiBloemfontein Celtic ngo 3-0. Lokhu kuyenzeka ebholeni. Thina siyafunda kulo mdlalo. Okwenzeke emdlalweni odlule sifundile kukho, sizama ukuthi kungabe kusenzeka. Kufanele siqedele amathuba siphinde simake kangcono kulokhu kunasemdlalweni odlule,” kusho uMicho.
“Ngicabanga ukuthi sineqembu elizokwazi ukwenza umsebenzi. Sesidlale ngokulingana emidlalweni eyisishiyagalolunye, engikholwa wukuthi iningi layo bekufanele siyiwine. Siphuma ezinsukwini eziyisikhombisa ezinzima lapho sidlale khona imidlalo emithathu sibhekene nePlatinum Stars, Ajax neMaritzburg United. Abadlali abazona izinsimbi, kukhona esinokungabaza ngabo kulo mdlalo. I-Ajax iyiqembu elihle. UMuhsin uphumuze uMusa Lebusa noZakri (Yannick) ukuze babhekane nathi besesimeni esihle. Inhlonipho yethu sizoyikhombisa enkundleni.”I-Pirates izodlala ngaphandle kukaMusa Nyatama ozobe edonsa isigwebo samakhadi aphuzi, Thabiso Kutumela okuthiwa uyagula, Luvuyo Memela noMpho Makola, uMicho athe banezinkinga ngokwehlukana.