Ithuba lomsebenzi entsheni engasebenzi
masiphinde sigebise amakhanda ethu sivumele amehlo ukuthi angqengqe ngale migqa embalwa kwelakho lodumo.
Namhlanje ngiwangcifiza ngisenyakatho nesifundazwe emgwaqweni onguthelawayeka uN2 ngilibangisa enyakatho lapho ngiyocoshacosha khona amaganu. Angithi yisikhathi sawo lesi. Ngiyakuqaphela ukuthi umgwaqo yiwona othwala umnotho wezwe ukwedlula zonke ezinye izinto zokuthutha.
Yebo ziyabiza ezinye izithuthi njengezitimela namabhanoyi kodwa zimbalwa uma uqhathanisa nalezi ezithubeleza ngemigwaqo futhi azikwazi ukufinyelela yonke indawo njengezomgwaqo.
Uma ucabanga ukuthi ilolikazi elihudula amankonyane amabili libiza ngaphezu kwezigidi ezimbili zamarandi, singakayibali impahla elisuke lishishinga nayo, uyabona ukuthi bangaki o-R2 million nemfalakahlana abaphithizela emigwaqweni yaleli lakithi. Emakhilomitheni awu-10 usuke sewuhlanganile namalolikazi amasondosondo angaba wu-10. Lokho-ke okusho ukuthi impahla ka-R20 million nemfalakahlana usuke usuyibone ngo “C”. Lana angikayibali impahla esuke ithwelwe yilezi zinqola zomlilo nazo ebiza itshe lemali.
Ngaphandle kokujikeleza ibhasi yithi ngihlale odabeni. Njengoba amaloli emaningi kangaka emigwaqweni yethu futhi eyithelela imigwaqo, kuyacaca ukuthi noma yimuphi umonakalo awudalayo emgwaqweni ungalungiseka ngaphandle kwenkinga. Ngaphezu kokuthi amaloli athela ngokuthe xaxa ngenxa yesisindo sawo, nabanikazi bawo nezinkampani bayayikhokha intela yokuhweba kuhulumeni wezwe. Lawo angaphandle ayakhokha uma engena kuleli zwe ngoba nawakithi enza njalo uma enqamula amazwe nemingcele ethutha impahla efukula wona belu umnotho waleli likaGondwana.
Uma uhamba usuka eThekwini ubheke eGoli ngeke ungaziboni iziqephu zembadada exebuka emalolini noma usuka eThekwini uze uyokuma ngeGolela noma ngeManguzi. Ukusuka eThekwini uze uyongena eMampondweni phesheya koMzimvubu yiso leso. Le mbadada ixebuka emasondweni amaloli kanti sekwaba khona izinkampani ezisiza amaloli aqhunyelwe amasondo emgwaqweni ezifika sezitatazela wena owabona isibawu sixakwe yilanga.
Kukhona-ke engikhala ngakho ukuthi lezi ziqephu zezimbadada eziphuma emasondweni zisala kanjalo emgwaqweni. Ingozi yalezi ziqephu wukuthi ziqinile uma zike zanyathelwa yimoto ikakhulukazi lezi ezincane zilisika libe yizicucu isondo.
Imigwaqo engothelawayeka njengo-N3, N2, N11 neminye iyona engivamise ukubona kuyo izicucu zamasondo axebuka emalolini.
Nakuba isiqiniseko ngingenaso kodwa ngiyazi ukuthi imigwaqo emikhulukazi ibuswa uSANRAL bona kanye laba abajaha ukugxumeka ama-toll gates.
Ngiyazi futhi ukuthi kukhona izinkampani ezifana noSpilltech ezisiza ukusula amafutha achitheke emgwaqweni lapho kade kwehle khona ingozi. Nezicishamlilo kuyenzeka zifike nenhlabathi noma nosadasi ukuzosula amafutha asuke echithekele emgwaqweni.
Kubona abosizo olusheshayo kuyenzeka ubone abanye sebeshanela izingcucu zamabhodlela afile bakubuyisele eceleni komgwaqo, sekuyolinda imvula. Nabanikazi bojibha uma bezodonsa izimoto ezishayisile, bajwayele ukushiya phansi izingcucu zobhampa abahlephukile, amatende nokunye. Zonke lezi zinto zisala eceleni komgwaqo okuthi uma kufika umoya noma imvula enkulu kuguguleke kanti okunye kuyabuya kube semgwaqweni, okunye kushona emhosheni.
Singama hazard siphonsela iSANRAL inselelo yokuthi inike abantu bakithi insonyama kulo mnotho oshishinga ngomgwaqo, baqoqe izibi eziyingozi emgwaqweni. Angithi iSANRAL yiyo umphathi wemigwaqo emikhulukazi kuleli zwe. Ngiyazi ukuthi abagundi botshani bayabuqoqa uma sebebusikile, ngakhoke nezicucu ezisala emalolini maziqoqwe.
Uma kungukuthi lukhona uhlelo lokuyaluza emgwaqweni kubhekwa lezi zithiyo, siyacela ukuthi luthi ukuqina ngoba kuyacaca ukuthi aluwenzi umehluko. Bhukula SANRAL, yandisa lezi zimoto esihlala sizibona zibhalwe ukuthi ziqaphe umgwaqo, ake ziqinise emshikashikeni wokuqoqa lezi ziqephu ziziyise lapho kuphekwa kabusha khona amasondo nenjoloba ukuze zingadali ingozi.
Nani bantu abasha abahlala bekhalela amathuba okuqashwa guqulani imiqondo nibhalele iSANRAL nilethe iqhinga lokugcina imigwaqo yethu ihlanzekile hleze kungancipha nezingozi nani niphume enhluphekweni. Lezi zicucu zidala ukuthi imigwaqo yethu iphenduke iziziba kumuke izimoto ngoba amanzi asuke engasagelezi ngokukhululeka.
Owayengumphathiswa wezokuThutha KwaZuluNatal, uMnuz Sbusiso Ndebele, waqhamuka nohlelo lukazibambele lapho omama bethola umsebenzi wokuhesha imigwaqo yangasemakubo bondle izingane. Ngakho kusengenzeka ukuthi kuqhamuke uhlelo lokufukula abantu abasha ngokuthi banqamulelane uthelawayeka kube yilabo nalabo bakhuculule imigwaqo yangasemakhbo bese beyahola bayeke ukuba okhangezile. Okuyi fiberglass kuye koshiswa noma kuyolungiswa kudayiswe ubusekeni obulungiswe kabusha kuthi okuyinjoloba kuyophekwa kabusha kwakhe ezinye izinto ezakhiwa ngenjoloba.
Hhayi-ke ngiyethemba oqhwayilahle bakithi bayezwa bazohlala izithonto kulo mcabango engibapha wona bhusende njengenduku.
Okwamanje sesingawacisha ama hazard ethu sibuyele emgwaqweni sishayele ngokucophelela sigade lezi zicucu. Asihloniphe yonke imithetho yezokushayela elawula leli zwe ukuze sihlangane sisaphila sonke nangesonto elizayo kuyo le nkundla.
Uma ungadelanga ngena ekhasini lethu Igedlela lami with Sthembiso Shangase kuFacebook. Yimi owenu nali ikheli ngezansi hazardiso@gmail.com