Ibhungu liklabhe abashana lababulala lona labulawa yiloli
USAPHITHENE amakhanda umndeni webhungu (21) okuthiwa liklabhe lalimaza unina, labulala abashana balo ababili libagenca ngobhushu, maqede lashayiswa yiloli lashona, eBhobhoyi.
Umndeni kaMnuz Siphamandla Smith awuwuvali umlomo ngesigameko esihlasimulisa umzimba esidlule nemiphefumulo yabashana bakhe uSiyamthanda (3) noThobani (2) okuthiwa bahlaselwe nguye ngobhushu izolo ekuseni, emuva kwehora lesithupha. Kuthiwa unina, uNkk Marry Smith usindile kulesi sigameko kodwa usesimeni esibi esibhedlela.
Ngesikhathi leli phephandaba lithinta lo mndeni izolo bewuzwakala ukuthi usakhungathekile futhi udidekile.
UNkk Nana Ngcobo uthe basafisa ukuthola ongabachazela ngokwenze indodana kababekazi wakhe ivuke ihlasele unina nabashana bayo.
Uthe uthole umbiko ophuthumayo kuthiwa akazobheka lesi sehlakalo. “Sisathukile futhi siphithene amakhanda ngale nto eyenzekile. Okubi wukuthi kwayena uSiphamandla ngeke size sikwazi ukumbuza ngoba ushayiswe yiloli washona emuva kwalesi sigameko. Ngeke ngithi uziphonse ezimotweni noma ushayiseke ethi uyawela kodwa naye ushonile,” kusho uNkk Ngcobo.
Kuthiwa uSmith ubebaklabha emakhanda ngobhushu.
Abashana bakhe kuthiwa bebeshayeke kabi eziphongweni kwaze kwaphuma ubuchopho.
Unina yena kuthiwa umklabhe ekhanda nasengalweni.
UNkk Ngcobo uchaze uSmith njengomuntu obethula kakhulu kodwa oqale ukuba nenkinga emuva kokudidekelwa wumqondo nyakenye. Ngokusho kwamalungu omndeni wakhe ukuphazamiseka kwakhe emqondweni bekumenza abuye abe nodlame kodwa akekho obelindele ukuthi angagcina enze lokhu akwenzile.
UNksz Zamo Smith uthe ubabekazi wakhe ubehlala noSmith ekhaya nabashana bakhe nezinye izingane zakubo, okubalwa unina womunye wabashana bakhe abashonile ngesikhathi ebahlasela.
UNksz Smith uthe unina wenye yezingane ezishonile nguyena ozithele phezu kwezidumbu zezingane nonina obelimele kakhulu kodwa esaphila.
Uthe umndeni wonke uphatheke kabuhlungu ngenxa yalesi sigameko.
Okhulumela amaphoyisa KwaZulu-Natal uLt Col Thulani Zwane uthe kuvulwe amacala amabili okubulala nelilodwa lokuzama ukubulala ngenxa yokuhlaselwa kwalaba bobathathu.
Uthe kukholakala ukuthi umsolwa ushayiswe yiloli ngesikhathi ebaleka.
Uthe kuzovulwa icala lokubulala ngokungenhloso.
UZwane uthe akuqondakali ukuthi umsolwa ubezama ukuzibulala yini.