Bakhala ngemali abayikweletwa wuhulumeni
ngokungabikelwa ukuthi selukuphi udaba lokuholelwa kwabo imali okwakufanele engabe bayithola ngesikhathi benikwa amaholo. Uthe isiphakamiso sokuthi bahole senziwa ngo-2014 kodwa baze baqala ukuhola ngo-2017. Uthe izinduna zifuna ukuholelwa imali okwakufanele ziholelwe yona kusukela ngo-2014.
“Asisho ukuthi sifuna ukusheshe siholelwe le mali kodwa siyafuna ukubikelwa ukuthi selukuphi udaba lwala maholo. Okusikhathazayo wukuthi sekuvele kwathuleka. Asisabikelwa lutho yize kwakungathi sizobikelwa ngaso sonke isikhathi,” kusho uXulu.
USihlalo wezinduna KwaZuluNatal, uMnuz Vusumuzi Mthethwa, uthe lolu daba lusezithebeni luyaxoxwa kodwa izinduna ziqinisile uma zithi azisatshelwa ukuthi seluhambe lwafika kuphi ludingidwa.
Uthe akumangazi ukuthi lolu daba alukasonjululwa namanje ngoba nodaba lokuholelwa kwazo lwathatha isikhathi eside kakhulu.
“Akekho owaphikisa ukuthi izinduna zikhokhelwe imali okwakufanele engabe zaqala kudala ukuyihola. Esikucelayo wukuthi zibikelwe ukuthi seluhambe lwafika kuphi udaba lwala maholo,” kusho uMthethwa.
Okhulumela Mnyango wokuBusa ngokuBambisana nezoMdabu, uMnuz Lennox Mabaso, uthe kunodaba olucishe lufane nalolu olusenkantolo ngakho ngenxa yalokho abakwazi ukukhuluma kabanzi ngalo ngoba ngabe bakhombisa ukungayihloniphi inkantolo. Uphinde waveza ukuthi kunzima kubo njengomnyango ukuthi bakhulume izindaba zezinduna ngaphandle kokuxoxisana namakhosi. Uthe izinduna ngezamakhosi ngakho uma kukhona izindaba ezizithintayo kudingeka ukuthi baqale emakhosini kuqala.