Kuyalwe izigungu zezikole ngomsebenzi
UNGQONGQOSHE wezeMfundo KwaZulu-Natal, uMnuz Mthandeni Dlungwane, usenxuse izigungu ezilawula izikole ukuthi kube yizona ezizogqugquzela ukuthula kunokuthi zibe phambili lapho kubhikishwa khona.
UDlungwane usho lokhu ngoba kwezinye izikole izigungu ezilawula izikole yizona ezidala udweshu, zivale izikole ngoba zingeneme ngokuthile.
“Ngithanda ukunxusa izigungu zabazali ukuthi kube yizo ezizoqhamuka nezixazululo. Sisizeni sixazulule zonke izinkinga ezibhekene nezemfundo,” kusho uDlungwane.
Ukusho lokhu ngesikhathi ethula umkhankaso wokhetho lwezigungu ezilawula izikole oluzoqala ngoMashi 1 kuya kuMashi 31 eCarter High, eMgungundlovu, ngoLwesihlanu. Lezi zigungu zizohlala iminyaka emithathu.
UDlungwane uthe uhlale ebuzwa ngokuthi ngabe abazali abangenazo izingane kuleso sikole kumele yini babe ngamalungu esigungu sabazali esilawula isikole.
“Yebo bangaba ngamalungu esigungu esilawula isikole. Isigungu singamthatha umuntu onamava abe yilungu laso. Kodwa lawa malungu awanalo ilungelo lokuvota,” kusho uDlungwane.
Uthe njengoba inhloso yabo kuwukufunda nokufundisa badinga izigungu ezizobhekana nalokhu.
“Kudingeka siqhamuke namaqhinga okuthuthukisa imfundo. Umnyango uzoqeqesha izigungu ezizokhethwa. Ngizolindela umbiko ngokuthi sekuhambe kwagcinaphi ngokuqeqeshwa kwezigungu.”
Uthe umsebenzi wezigungu zabazali wukuqinisekisa ukuthi isikole siyathuthuka futhi kuyafundwa yini.
“Akuwona umsebenzi wezigungu ukuthi zibhekele ukusebenza kwansuku zonke kwezikole ngoba likhona ithimba labaphathi elisuke libhekele lokho. Umsebenzi wezigungu ukubhekana nezinto ezithinta imigomo, ukulawulwa kwemali yesikole, ukuphepha kwesikole nokuqinisekisa ukuthi kuyafundwa. Akugwenywe ngayo yonke indlela ukuphazanyiswa kwezikole.”
Ubonge wonke amalungu ezigungu zabazali eseziphelelwe yisikhathi wathi enze umsebenzi oncomekayo wokufukula isizwe ngemfundo.