Bashaqekile othisha kusha amakilasi akwa-matric
BASHAQEKILE othisha baseFundinduku Secondary eTafelkop ngaseNteke, abafike esikoleni ngoLwesihlanu ekuseni sisha.
Kulesi sehlakalo kushe amakilasi amabili akwa-matric, ihhovisi likathishanhloko, izincwadi zabafundi namafayela.
Omunye wothisha ongeke adalulwe ngoba engavumelekile ukukhuluma nabezindaba, uthe sebeyasaba manje ngoba abazi ukuthi ngubani owenze lokhu.
Uthe kusize omunye usomatekisi ohlabe umkhosi ngabo-4 ekuseni ebona isikole sigqamuka amalangabi.
“Sishaqekile sifika kungqongqa amakilasi amabili akwa-matric. Kushe amadeski, amafayela abafundi, izincwadi zokufunda nezinye izinto. Asazi ukuthi umlilo udalwe yini,” kusho lo thisha.
Uthe abazi noma kushise labo abajwayele ukugqekeza noma kukhona abakulayithile okokhele umlilo.
“Kujwayelekile ukuthi bagqekeze esikoleni njengoba singenaye unogada. Noma kufundiwe kodwa abafundi basheshe bagodukiswa. Asinawo amanye amakilasi akwa-matric, yilawa amabili ashisiwe. Abafundi bakwaGrade 11 abanamakilasi amathathu sibahlanganisile ukuze u-matric uqhubeke ufunde. Silinde umnyango ukuthi usisize ngamakilasi,” kuqhuba lo thisha. Uthe umonakalo ubalelwa kuR300 000, emakilasini ashisiwe bebengu-90 abafundi bawo.
UMnuz Kwazi Mthethwa, okhulumela uNgqongqoshe wezeMfundo eKZN uMnuz Mthandeni Dlungwane, uthe abayazi imbangela yokushiswa kwesikole.
Uthe udaba lokushiswa kwalesi sikole balubike emaphoyiseni.
“Siyasigxeka lesi senzo ngoba sizophazamisa ukufunda. Sinxusa noma ngubani ongaba nolwazi ukuze kuboshwe abathintekayo ukuthi eze nobufakazi abikele amaphoyisa. Ngeke sibubekezelele ubuxhwanguxhwangu.”