‘Izikole zanikwa eyokukhokhela ugesi’
UNGQONGQOSHE wezeMfundo KwaZulu-Natal uMnuz Mthandeni Dlungwane uthi ezinye zezikole ezingazange ziwukhokhele ugesi namanzi eThekwini zazinikiwe imali yokukhokha.
Usho lokhu nje ezinye zezikole zavalelwa ugesi nguMasipala weTheku ngoba zingakhokhile.
Uthe wahlangana neMeya yeTheku uNkk Zandile Gumede bavumelana ngokuthi zivulelwe ugesi lezi zikole.
UDlungwane uthe sebecabanga nokuthi bakhulume nomasipala kanjalo ne-Eskom ukuze okungenani izikole zikhokhe imali eyodwa uma zikweleta imali yezinsiza.
“Kumele kube nohlelo esizolwenza ukuze izikole zingavalelwa ugesi.
Yinto okumele iqale ixoxwe kabanzi kodwa yinto esiyicabangayo ukuthi uma sihlangana nalezi zinhlaka, omasipala kanjalo no-Eskom ukuthi kukhokhwe imali ethile ezolingana kukhokhelwe izinsiza.
Uma kunjalo sizokwazi ukuyibamba imali yezinsiza ukuze sikhokhele ngqo omasipala ngoba ezinye zezikole zanikwa imali yokukhokha kodwa zona zangakhokha,” kusho uDlungwane.
Ukusho lokhu ekhuluma emhlanganweni wekomiti lezemfundo esiShayamthetho eMgungundlovu ngoLwesihlanu.
Okhulumela imeya yeTheku, uMnuz Mthunzi Gumede, uthe iyaqhubeka imihlangano yemeya ngendaba kagesi.
“Imeya isamile ekutheni akumele izikole zivalelwe ugesi.
Sisebenzisana noMnyango wezeMfundo kulolu daba, sihambele imihlangano sikhulume nezikole, sibakhathalele abafundi ngakho ngeke siwuvale ugesi,” kusho uGumede.
UDkt Rishigen Viranna weDA, uzwakalise ukukhathazeka ngokuthi kunezikole ezibalelwa ku-35 okuthiwa zivalelwe ugesi eThekwini ngenxa yokungakhokhi.
Uthe lezi zikole zikweleta imali engaphezulu kukaR80 million.
UNksz Nontembeko Boyce, we-ANC uthe nasoKhahlamba kube ngesifanayo izinsiza kazikhokhelwe yizikole.
Amalungu abuye akhala ngokungavalwa kwezikhala zabahloli nabaluleka ngezifundo emahhovisi ezifunda, athi kwenza kube nzima ukusebenza.
UDlungwane ubuye wakhala ngokungavalwa kwezikhala emnyangweni wathi kwenza kube nzima ukusebenza.
“Yinto esihlale siyibika kumgcinimafa ukungavalwa kwezikhala emnyangweni. Kunesikhala nje seDeputy Director General esashiywa nguDkt Nzama (Enock, oseyinhloko yomnyango wezemfundo) sokubhekela uhlelo lokufunda nokufundisa, okumanje asivaliwe.
Akusona lesi kuphela ziningi nezinye zabahloli ezingavaliwe,” kusho uDlungwane.