Uyalulama esibhedlela umgijimi ohlaseliwe
ULULAMELA esibhedlela umpetha ka-5000m uThabang Mosiako ngemuva kokulimala ekhanda ekade ehlaselwa okusolakala ukuthi kungenxa yokucwaswa ngokwebala.
Lokhu kuthiwa kwenzeke ePotchefstroom, eNorth West, ngesonto eledlule. Umbiko okhishwe yiPotchefstroom Herald ngempelasonto uveze ukuthi uMosiako ukhahlelwe kanzima ekhanda wagaklazwa phansi yiqeqebana labamhlophe elilinganeselwa ku-10 eNorth West University.
UMosiako (22) waphaphama esesesibhedlela ngelanga kwenzeka lokhu (Febhuwari 4). Ngesikhathi kwenzeka wayenabangani bakhe uRantso Mokopane noSandy Londt nabo okuvela ukuthi bahlaselwa. UMokopane ungumpetha wakuleli we-3000m steeplechace kanti nguyena oveze lokhu ekhasini lakhe leFacebook.
“Okwesine sihlaselwa endaweni esondelene neNWU lapho uzakwethu esiziqeqesha naye elinyazwe kanzima ekhanda okungenzeka kumenze aphathwe yikhanda impilo yakhe yonke. Ngihlezi ngigwema izinto eziphathelene nebala kodwa kuzona zonke izehlo ezine kuhlezi kungamadoda amhlophe alimaza abamnyama ngaphandle kokuthathelwa izinyathelo. Kungiphatha kabi ukuthi ngisho amaphoyisa nabezokuphepha bayahluleka ukusivikela uma sidinga usizo #Cry_Our_Beloved_Country,” kubhala uMokopane.
Uthe indaba iqale eNews Cape ePotschefstroom ngesikhathi abafundi bethuka umsebenzi wasethilini. “Ngingenelile ngabacela ukuthi bayeke ukuthuka lowa sisi. Uma sengiya ngaphandle iqeqebana elilinganiselwa ku-10 elinemizimba eyizidlakela njengabantu be-rugby lisihlaselile. Amaphoyisa afikile ayimisa impi kodwa aqonde thina asishaya engathi yithina ebesisephutheni. Sizizwe sibukeleke phansi. Sibalekile. Endleleni sibone enye imoto yamaphoyisa sacela ukuthi asiphelezele siye ngaphakathi esikhungweni ngoba besazi ukuthi abahlaseli basazobuya. Anqabile amaphoyisa. Ngemuva kwemizuzwana baphinde basihlasela kade becashe efokizini elilapho,” kulandisa uMokopane kwiHerald.
Uthe abahlaseli bese bebaningi. Ngesikhathi yena nomunye uzakwabo bebaleka babe sebengenele uMosiako.
“Bebemkhahlela ekhanda nasemzimbeni ngesikhathi elele phansi. Babalekile sebebona amaphoyisa eza bamshiya ethule phansi okuyilapho ephuthunyiswe khona esibhedlela.”