Buyadingeka impela manje ubulungiswa odabeni lukaMeyiwa
UNGQONGQOSHE wezamaPhoyisa, uMnuz Fikile Mbalula, usethembise isizwe ukuthi luseqhulwini uphenyo lwecala lokubulawa kowayengunozinti weBafana Bafana ne-Orlando Pirates uSenzo Meyiwa.
Sekushintshwe nethimba eliphenya lolu daba futhi uMbalula uthe unethemba lokuthi bazobanjwa abagila lo mkhuba.
Kuyamangaza futhi kuyaphoxa nokho ukuthi sekuphele iminyaka emithathu kungacaci ngaleli cala elilokhu liyinzukazikeyi.
Uma kungabanga khona zinguquko kwiKhabhinethi, ngo-Ephreli uMbalula uzobe eqeda unyaka aba nguNgqongqoshe wezamaPhoyisa.
Kepha umnyakazo ngaleli cala yinxa uba khona manje ngoba nakhu sekube khona oqunge isibindi wavusa umkhankaso kuTwitter wokuthi kutholakale ukuthi kwenzekani ngempela ngobusuku bango-Okthoba 26, 2014 kubulawa uMeyiwa.
Kuyimanje usaqhubeka lo mkhankaso kule nkundla yokuxhumana ngesiqubulo esithi #JusticeForSenzoMeyiwa.
Kubuyisa ithemba kona okushiwo wuMbalula kepha kuphinde kuqubule umbuzo wokuthi ukube lo mkhankaso awufuqwanga kwiTwitter bekuyogcina kuphelelephi?
Uyise kaSenzo, uMnuz Sam Meyiwa, selokhu akhala kusukela ngo-2014 ngokugqoza kwenqubekela phambili kuleli cala.
Kucacela ngisho nengane esakhasa ukuthi kukhona okushaya amanzi kuleli cala okuvimbela ukuthi uphenyo lwalo lufinyelele esiphethweni kuboshwe owabulala uSenzo.
Ngesonto eledlule kusuke umsindo esizweni ngemuva kwenkulumo kaLongwe Twala, oyindodana kaChicco Twala ongumculi obuye abe nguphrojusa.
ULongwe noyise bakhulume ngezinsuku ezehlukene emisakazweni nalapho abaningi abalalele le nkulumo beshaya amakhala ngabakusho.
Ukuze leli cala lifinyelele esiphethweni, ithimba elisha elijutshwe kuleli cala silindele ukuthi lisebenze ngokungenzeleli nangokungesabi.
Silindele ukuthi kube nobulungiswa, owabulala uSenzo aboshwe, abhadle ejele.