Seyisemanyuvesi imali yokufunda mahhala
ISIKHISHIWE imali yanikwa amanyuvesi ukuze aqhubeke abhalise izitshudeni ezizokwenza unyaka wokuqala nezizofunda mahhala.
Lokhu kuvezwe abesikhwama esixhasa izitshudeni ngemali iNational Students’ Financial Aid Scheme (NSFAS) abathi le mali izosiza ekutheni izitshudeni zithole izincwadi nezinye izidingo.
Okhulumela iNSFAS, uMnuz Kagisho Mamabolo, uthe kabalindele ukuthi kuzoba nezitshudeni ezizochithwa zingabhaliswa ngoba kuthiwa zisakweleta izikhungo zemfundo.
Uthe kumanje sebekhiphe uR1.5 billion bawunika amanyuvesi ukuze aqhubeke nomsebenzi.
“Okwamanje izikhungo zisathole u-13% ukuze zikwazi ukuqhubeka zibhalise izitshudeni. Amanyuvesi axhumana nathi ukuze asilethele ulwazi ngezitshudeni eziqalayo ezizoxhaswa. Sinesivumelwano namanyuvesi ngakho silindele ukuthi asilandele lesi sivumelwano.”
Uthe lesi sivumelwano sifaka ukuthi izitshudeni zibhaliswe njengoba kuwumgomo kahulumeni ukuthi abahluphekayo kumele bafunde mahhala.
“Asikho isitshudeni esithole uxhaso kulesi sikhwama okumele sikhokhiswe imali yokubhalisa. Izitshudeni azibhaliswe mahhala,” kusho uMamabolo.
Uthe iNSFAS namanyuvesi basohlelweni lokuqinisekisa ukuthi ziyasizwa izitshudeni ezamukeliwe ukufunda emanyuvesi kodwa ezingazange zifake izicelo zokuxhaswa ngonyaka odlule.
“Uma abazali babo behola ngaphansi kuka-R350 000 ngonyaka umholo wabo uhlanganiswe kumele bayitshele inyuvesi ukuze basizakale. Kumele beze nomazisi, omazisi babazali, ama-payslip abazali, nencwadi evela kumzali enika imvume iNSFAS ukuthi icubungule indaba yomholo wekhaya,” kuqhuba uMamabolo.
Uthe izitshudeni kufanele zisayine amafomu ashoyo ukuthi zizosikhokha isikweletu uma kungukuthi uhlelo lokucubungula ama-payslip nemali engena ekhaya luveza ukuthi zizokwazi ukukhokha. Uthe uxhaso lwemfundo yamahhala lugxile kuphela ezitshudenini ezifikayo emanyuvesi nonyaka.
“Labo abebevele bexhasiwe, kusazosetshenziswa uhlelo oludala lokuthi abazali kumele bahole ngaphansi kuka-R122 000 ngonyaka ukuze baxhaswe. Ngeke livulwe elinye ithuba lokufaka izicelo kwabangazange baveze ukuthi badinga uxhaso.”