Izikhalo kugasele uKaunda nezakhe
UHLALISWE lubhojozi yizingane ezibamba inkunzi umphakathi waKwaBester eNanda. Lokhu bakutshele uNgqongqoshe wezokuThutha nokuPhepha koMphakathi KwaZulu-Natal uMnuz Mxolisi Kaunda, obezohlola ezokuphepha ngoMgqibelo.
Umphakathi ukhala ngokuthi awusakwazi nokuhamba ngokukhululeka kule ndawo enamaphaseji okuthiwa izingane ezineminyaka engu-16 nangaphansi zihlala kuwona ziphuce abantu amaselula. Umphakathi uthe lezi zingane ezibizwa ngamaphara ziyaziwa endaweni kodwa seziyizigebengu ezisatshwayo.
UKaunda, obehola umkhankaso wokuvundulula izikhali eziyingozi, izibhamu ezingekho emthethweni nezidakamizwa kule ndawo, uthe umphakathi awusukume usebenzisane namaphoyisa ukulwa nobugebengu.
Umkhankaso wokungena emashibhini nokuseshwa kwezimoto nabantu emgwaqweni uqale ngezithuba zawo 7 ntambama amaphoyisa echithwe ngobuningi.
Ungqongqoshe, oqale wabonga amaphoyisa ngokusebenza ngokuzimisela ngamaholidi kaKhisimusi, uthe zehlile izibalo zobugebengu ngonyaka odlule kuneminye iminyaka.
“Njengoba ngilapha ngizophaka impi phakathi kwethu nezigebengu. Kumele silwe ngayo yonke indlela nobugebengu futhi sizikhombise izigebengu ukuthi sisempini. Ngicela niqhubeke nokubonakala emphakathini ukuze uphephe,” kusho uKaunda.
Amathimba amaphoyisa aphume ngokuhlukana kungenwa kwa-M KwaMashu nakwaBester. Emashibhini adayisa engenayo ilayisensi amaphoyisa athwale amakesi otshwala namabhodlela kwafakwa emavenini. Kube nzima kufikwa kwelinye ijoyinti okuthiwa ngelesalukazi abaphuza kulona bevuka umbhejazane bezivikela. Bagxeke amaphoyisa ngokwesaba izigebengu kodwa alwe nabadayisa utshwala bezama ukuziphilisa. Amanye amalungu omphakathi abencoma ukubonakala kwamaphoyisa ethi nezigebengu sezizosaba.
Kuphunywe emashibhini kwaseshwa izimoto, amatekisi nabahamba ngezinyawo. Enye insizwa elahlwe elakubo ibihamba nabangani ngeVW Polo obekukhona kuyo nomfanyana.
Amaphoyisa aseshe imoto athola owesilisa obengumgibeli kule moto, ephaketheni lakhe kunesijumbana se-cocaine. Lo mlisa uvele wazithukisa uma kutholwa le mpushana ephaketheni lakhe. Amaphoyisa athole ne-straw okusolwa ukuthi ubebhema ngaso. Lo mlisa uboshiwe kanti umngani wakhe obeshayela, othe akazi lutho ngezidakamizwa, usale enkemile.
Kuphinde kwaboshwa omunye umlisa otholakale nensangu nomunye obeshayela engenazo izincwadi.
UKaunda izolo uqhubeke nokulalela izikhalo zomphakathi waseNanda njengoba ebe nomhlangano ehholo lomphakathi eNewtown C. Umphakathi ukhala ngokuthi kudla lubi ukusetshenziswa kwewunga kule ndawo okuyikona okwandisa ubugebengu.