Ukhomba umthetho odabeni lukaNdoro
adlale eNingizimu Afrika ngoba ikholwa wukuthi kuphambene nomthetho wenhlangano yebhola lomhlaba iFifa ukuthi umdlali adlalele amaqembu amathathu ngesizini eyodwa.
Ekuqaleni kwesizini uNdoro udlalele iPirates ngaphambi kokusayiniswa yi-Al Faisaly yaseSaudi Arabia.
Ujoyine i-Urban Warriors ngenyanga edlule. Isigungu sePSL esiqondisa ubugwegwe, iDispute Resolution Chamber (DRC), sinqume ukuthi uNdoro aqhubeke nokudlala kodwa iPSL yanquma ukusiphikisa lesi sinqumo.
Udlale kowePirates nowePolokwane City. La maqembu womabili afake izimangalo ngokudlaliswa kwakhe. I-DRC izohlalela udaba lukaNdoro ngoLwesine.
U-Ertugral useke wakusho ukuthi akayiboni inkinga ngokudlalisa uNdoro ngoba umthetho weFifa uyakuvumela ukuthi umdlali adlalele amaqembu amathathu, inqobo nje uma esemazweni ahlukene.
“Kuhlale kuyindaba yokuhlaziya umthetho. Akusekho ezandleni zami.I-DC isikhiphile isinqumo. Sakhuluma nososeshini wathi singamdlalisi sibhekene neFree State Stars, samyeka. Emuva kwalokho kuphume isinqumo sokuthi singamsebenzisa samdlalisa. Manje sizobona ukuthi kwenzekani. Akusekho ezandleni zethu.
“Ngiyacabanga, ngiyethemba, ngiyakholwa ukuthi bayazi ukuthi benzani. Kungendlela esiwufunda ngayo umthetho. Kuyangixaka ukuthi uma umdlali eyodlala phesheya, wafika waxakeka kodwa evele esedlalele amaqembu amabili eNingizimu Afrika uzoshonaphi uma engabuyeli lapho eqale khona? Ngokwami njengomqeqeshi akunabo ubuhlakani. Kufanele abuyele ezweni abedlala kulona. Ngicabanga ukuthi ngokuqonda umthetho kuzoxazululeka ngokushesha,” kusho u-Ertugral.
I-Ajax ingelinye lamaqembu abhekene nezembe kwiPremiership. Libuyise u-Ertugral ngoba lizama ukusuka endaweni eyingozi. I-Urban Warriors isendaweni ka-15 kwi-log ngamaphuzu angu-21 emuva kwemidlalo engu-21.
U-Ertugral ukuchithile ukuthi ukuphuma kwiNedbank kufana nesibusiso ukuze bagxile emidlalweni yeligi.
“Angikholelwa kulokho. Ngicabanga ukuthi umdlalo nomdlalo kukhona okufundisa kona. Sidlale neqembu elihle futhi ngiyakholwa ukuthi uma singadlala ngendlela esadlale ngayo nePirates, leyo mizuzu engu-60 kuya kwewu70, amaqembu azobhekana nathi azosizwa kahle. Besifuna ukudlulela phambili, besifuna ukuwina namuhla besingabheki ukuthi kuzokwenzekani ngesonto elizayo,” kusho u-Ertugral.