Avule kahle amele leli kweyeCAF
AZIBULE ngemiphumela encomekayo amaqembu amabili abemele iNingizimu Afrika kweyokuhlungela ukudlala kweyamaqoqo kule mpelasonto, ngaphansi kweCAF Champions League neCAF Confederation Cup ngokwahlukana.
I-Bidvest Wits edlala kwiChampions League, kwazise yiyona ekhonyayo kwi-Absa Premiership (inkomishi isekhabetheni labo), inqobe kalula ngo 2-0 idlala nePample Mousses SC yasesiqhingini iMauritius.
Lo mdlalo bekungowomlenze wokuqala kweyokuhlungela ukudlulela kweyamaqoqo lapho bezofica khona iMamelodi Sundowns. IWits inqoba kalula eBidvest Stadium ngoMgqibelo nje, uGavin Hunt ubebophele isikimu abaningi abangasibona sengathi sithambile.
Bebesebhentshini lapha abadlali abafana nokaputeni uThulani Hlatshwayo, Moeneeb Josephs, Edwin Gyimah, Dylon Claasen noLehlohonolo Majoro. Ngaphambi kokuqala kwalo mqhudelwano uHunt uthe usekhathele wukugxekwa ngokuthambisa isikimu emidlalweni yeCAF.
Nakuba ekhulume kanje lo mqeqeshi ngaphambi komdlalo kodwa isikimu sakhe sikhombe okunye. Kube yisibusiso kubadlali abafana noThabang Monare ongasalijwayele ijezi nabadlali abafana no-Eleazar Rodgers. Beziyisishiyagalolunye izinguquko ebezenziwe uHunt eqenjini lakhe uma uliqhathanisa nelidlale neCape Town City ibakhipha kwiNedbank Cup Last 32 ngeledlule.
UKobamelo Kodisang nguyena obeke phambili iWits kwathi elokuqinisekisa ukuthi umlenze wesibili ekuhambeni ngeke ube nankinga, lananyatheliswa uRodgers enethini. Owomlenze wesibili useMauritius ngoFebhuwari 20.
Kwenzeka konke lokhu eGoli nje, eSomhlolo Stadium, eSwaziland, iCape Town City inqobe seliyoshona ngo 1-0 wegoli likaNana Akosah-Bempah kwiYoung Buffaloes.
Lo mdlalo weConfederation Cup bekubukeka sengathi uzophela begingqa amaqanda kodwa lakhala enethini sekusesele imizuzu emihlanu umdlalo uphele.
Umlenze wesibili ungoFebhuwari 21 eKapa.