‘Akungaphindiselwa kwabasolwa ngobugebengu’
IBAMBA loMkhuzi wamaPhoyisa KwaZulu-Natal, uMajor General Bheki Langa, linxuse umphakathi ukuba ungaziphindiseleli kubantu obasola ngobugebengu.
ULanga ukusho lokhu ngemuva kokuboshwa kwamadoda amahlanu ngecala lokubulala obesolwa ngokuba yisigebengu kwaK KwaMashu.
“Kuphambene nomthetho ukuziphindiselela kumuntu ngoba umsola ngokuthi wenze icala futhi abenza lokhu bangazithola sebeboshwa. Siyakwamukela ukusebenzisana kwamaphoyisa nomphakathi ukuze kuliwe nobugebengu kodwa siyaphoxeka kakhulu ngalaba abaziphindiselelayo uma kukhona abenza ubugebengu. Abasolwa ngokuba yizigebengu kumele benikelwe emaphoyiseni bangahlaselwa ngoba lokho kuyicala,” kusho uLanga.
Esehlweni saKwaMashu kuthiwa umsolwa washaywa waze wafa ngamalungu omphakathi ayemsola ngobugebengu emgwaqweni uPhothwe ngoFebhuwari 6.
Okhulumela amaphoyisa KwaZulu-Natal, uLt Colonel Thulani Zwane, uthe amadoda amahlanu aboshwe ngoFebhuwari 8 ase evela eNkantolo yeMantshi yaseNtuzuma izolo ngecala lokubulala. Idokodo ngecala lisagcinwe enkantolo.