Zishintshile izinto kwi-ANC esiholwa nguRamaphosa
KUNESISHO sesiNgisi esithi qaphela ukuthi yini oyifisayo ngoba ingenzeka okwangempela. Lesi sisho imvamisa sisuke sixwayisa ngokuthi okufisayo kungenzeka kuthi uma sekufezeka kujike kukuxake.
Eminyakeni engu-10 eyedlule uMengameli Jacob Zuma engena esikhundleni sokuba ngumengameli we-ANC wayeyimfivilithi yabaningi kwi-ANC njengoba azidlela amahlanga engqungqutheleni yokukhetha ubuholi eyayingoDisemba 2007.
Ngo-2009 wangena esikhundleni sokuba ngumengameli wezwe ethwelwe ngeqoma kanti abanye babeze bathi bangamfela nokumfela uZuma.
Ngalesi sikhathi kwakucaca ukuthi iningi lamalungu e-ANC kalizwa mshini ngaye.
Wayetuswa ngokukwazi ukuxhumana nabantu emazingeni ehlukene empilo, ikakhulukazi aphansi futhi eyithemba labampofu ngokuthi uzokwazi ukuletha intuthuko empilweni yabo.
Kepha manje seligaya ngomunye umhlathi, zijikile izinto kwi-ANC njengoba umengameli wayo sekunguMnuz Cyril Ramaphosa oyiphini likaZuma kuhulumeni.
Into ekhulunywayo manje kwi-ANC njengoba isimagwala mabili, ngeyokuthi uZuma abeke phansi izintambo ekubeni ngumengameli wezwe.
Ezinye zezizathu ezihamba phambili ezinenge abantu ngaye yizinsolo zenkohlakalo abhekene nazo nobudlelwane nomndeni wakwaGupta okuthiwa bunuka phu inkohlakalo.
Manje i-ANC isitusa uRamaphosa okugqanyiswa ukuthi uzokhukhuluza inkohlakalo ebuyisele emuva izwe ekuthuthukiseni umnotho nempilo yabantu.
Njengoba esephelile amahlathi kuZuma, siyethemba ukuthi uhulumeni omusha uzobuyisa isithunzi sokuphathwa kombuso ikakhulukazi kwezezimali.
Abazongena kuhulumeni omusha kumele baqikelele ukugwema amaphutha agcine esemosha isithunzi se-ANC.
Amathemba ezinkumbi zabantu abahlwempu akuRamaphosa nezakhe manje kanti nayo i-ANC ithembele kulesi sigungu ukuba sibuyise isithunzi seqembu.
Siyethemba ukuthi izifiso ze-ANC ngeke ziyixake ekugcineni kuze kube nesimo lapho umholi owayetuswa aphenduke iqaqa.