Izigcawu ngodaba lwaseMatatiela

ZIYAQALA izigcawu zomphakathi mayelana nesiphakamiso sokuthi kuchitshiyelwe umthethosisekelo odabeni lokususwa kweMatatiela e-Eastern Cape ibuyiselwe KwaZulu-Natal.

Isigcawu sokuqala sizoba seBhongweni eKokstad namhlanje esifundeni iHarry Gwala.

Ikomiti lesikhashana lesiShayamthetho saKwaZuluNatal lizolalela uvo lomphakathi mayelana nesiphakamiso sokuthi kubuyiselwe iMatatiela eKZN. Isigaba somthetho uSection 74(5) seziphakamiso zokuchitshiyelwa komthethosisekelo sidinga ukuthi kube nezinkulumo-mpikiswano emphakathini ngaphambi kokuthi kuphasiswe umthetho othile.

Izingxoxo mayelana neMatatiela kade zaqala kodwa azifinyeleli esiphethweni. Sekwenziwe namaKhomishini amaningi abecubulunga lolu daba okubalwa nekaSteyn and Trengrove kodwa lutho isisombululo.

USihlalo wekomiti lasesiShayamthetho, uMnuz Sipho Gcabashe, uthe ngalezi zigcawu zomphakathi bahlose ukufaka zonke izinhlaka ezithintekayo kulolu daba.

“Izigcawu zokuqala zizoba sezindaweni eziseduze okubalwa kuzo iKokstad ezingase ziphazanyiswe yilolu hlelo,” kusho uGcabashe.

Uthe kusasa umphakathi uzohlangana esiShayamthetho uqhubeke nokubhunga ngalolu daba.

I-African Independent Congress (AIC) isize i-ANC ukuze ihole uMasipala waseKurhuleni nowaseRusternburg ngaphansi kombandela wokuthi kumele yeseke ukuthi iMatatiela ibuyiselwa eKZN.

I-ANC ingene kulo mshado ne-AIC ngemuva kokulahlekelwa omasipala abakhulu okhethweni lohulumeni bezindawo ngo-2016.

I-AIC isabisa ngokuthi izophuma emshadweni ne-ANC uma ingasigcini isithembiso sayo.