Lingahlakazwa iPhalamende: uSolwazi
UNGOTI wezindaba ezithinta uMthethosisekelo, uSolwazi Pierre de Vos, uthe uMthethosisekelo uyakuvuma ukuthi iPhalamende lingahlakazwa ngaphambi kokuphela kwesikhathi salo.
Engxoxweni neSolezwe izolo, uDe Vos uthe isiphakamiso samaqembu aphikisayo sokuthi kuhlakazwe iPhalamende kuphinde kube nokhetho ngokushesha singaphumelela ngokuvunywa yisigaba somthetho uSection 50 kuMthethosisekelo.
“Kungenzeka lokhu okufunwa amaqembu aphikisayo yize kona kungakaze kwenzeke kuleli phambilini,” kusho uDe Vos.
Uthe iPhalamendde liyakwazi ukuthi lihlakazwe uma selihlale iminyaka emithathu.
“Uma lihlakazwa kubamba uSomlomo isikhathi esingangenyanga kusalungiselelwa ukuthi kwakhiwe iKhabhinethi entsha,” kusho uDe Vos.
U-De Vos uthe isiphakamiso sokungabethembi ubuholi bukaMengameli Jacob Zuma singenziwa yinoma yiliphi iqembu ePhalamende.
IPhalamende lizophelelwa yisikhathi salo ngonyaka ozayo ngemuva kokhetho lukazwelonke obelungo-2014.
Umhlaziyi wezepolitiki, uMnuz Xolani Dube, uthe amaqembu aphikisayo anaso isisekelo esiphakamisweni sawo sokuthi kuhlakazwe iPhalamende nokuthi kube nokhetho ngokushesha.
UDube uthe amaqembu aphikisayo asefake kakhulu ipolitiki odabeni lokuthi uZuma ehle esikhundleni.
“Amaqembu aphikisayo awasenzi lesi siphakamiso sawo ngoba ecabangela izwe kodwa asenza ngoba efuna ukuzuza kwezepolitiki ngoba wona ayazuza ngomsindo osuke ukhona,” kusho uDube.
Uthe i-ANC ingaphansi kwenkulu ingcindezi njengoba ibhekene nokuthi inqume ngekusasa likaZuma.
“UZuma nguyena kuphela onganika i-ANC impilo ngokuthi azehlele esihlalweni,” kusho uDube.
Uthe ubona uZuma ezogcina ezehlelile esikhundleni, wengeza ngokuthi akamboni efuna ukuthi igama lakhe lingene kabi emlandweni ngokuthi abe ngumengameli owabulala inhlangano.
Omunye umhlaziyi wezepolitiki, uMnuz Thabani Khumalo, uthe isiphakamiso samaqembu aphikisayo asisoze saphumelela.
“Le nto abayishoyo ayihlukile emizameni abahlale beyenza yokuphakamisa ukuthi abasabethembi ubuholi bukamengameli kodwa bebe bazi kahle kamhlophe ukuthi izibalo azibavuni,” kusho uKhumalo.