UMphasane ukhaliswa wukushiya abadlali bakhe aye eKapa
UKHALISWA wukushiya ngemuva abadlali bakhe umqeqeshi weSwallows, u-Isaac Mphasane, ezakhe ezibambe iMaritzburg United zagcina zikhale ngaphansi esikhathini esengeziwe emdlalweni weLast 32 yeNedbank Cup.
ISwallows, edlala kwi-ABC Motsepe League yaseGauteng, ihlulwe yiTeam of Choice ngo 3-1 eDobsonville Stadium ngoMgqibelo. Ngesonto eledlule kusabalale izindaba zokuthi iqembu selithenge ilungelo lokudlala kwiNational First Division (NFD) leCape Town All Stars ekhishwe kwiNedbank yiMamelodi Sundowns ngo 1-0 ngoLwesihlanu.
Nakuba izikhulu zeSwallows zenqabile ukuqinisekisa lokhu kodwa uMphasane uphahlukile wathi okumphatha kabi wukuthi uzoshiya abadlali bakhe ayohlala eKapa. Ngokomthetho wePremier Soccer League (PSL) iqembu kufanele lihlale isizini eyodwa endaweni ebelikuyo lingakathengwa. Nokho lokhu akuhlale kugcinwa ngoba ngesikhathi uJohn Comitis ethenga iMpumalanga Black Aces uyifudukisele eKapa ngaso leso sikhathi wayibiza ngeCape Town City ekuqaleni kwesizini ka-2016/2017.
Ngokohlelo lweSwallows kubukeka kuzoba neqeqebana labadlali abazofudukela eKapa ekuqaleni kwesizini ezayo nakuba kungakacaci ngokuzokwenzeka ngeqembu elikhona njengamanje nabadlali abazosala. UMphasane uqale ukuqeqesha iSwallows ekuqaleni kwesizini. Isendaweni yesithupha kwi-log.
“Akwehli kahle ukuthi ngizobashiya laba bafana ngiyohlala eKapa ngesizini ezayo. Kodwa sengivele ngibabonile abazodlala kahle nabanye abakuyona iCape Town All Stars,” kusho uMphasane.
Isikhulu seSwallows, uPanyaza Lesufi, siveze ukuthi sekusele kancane ukuthi ixazululeke inkinga ngegama elithi iMoroka njengoba besebenzisa elithi Swallows kuphela. Uthe wethemba ukuthi kuzoqala isizini ezayo sebevumelekile ukubiza iqembu ngeMoroka Swallows.
Mayelana nomdlalo wangoMgqibelo, uMphasane uthe ujabule ngendlela abadlale ngayo abafana bakhe.
“Ngikholwa wukuthi lo mdlalo ubakhulisile futhi bazogqugquzeleka ukuthi bayibambe kakhulu emidlalweni yeligi. Sisendaweni yesithupha futhi ngicabanga ukuthi sisenalo ithuba lokuqeda phezulu. Kulo mdlalo ngicabanga ukuthi senzelwe phansi wukulimala kwabadlali,” kusho uMphasane.
Umqeqeshi weMaritzburg, uFadlu Davids, uvumile ukuthi iSwallows ibikade ingcono kunabo enkundleni.
“ISwallows ifanelwe wukudlala kwiPSL. Umlando webhola laseMzansi uyayidinga. Bebeyiqembu elingcono kunathi enkundleni. Ngiyababongela. Ekugcineni amava asebenzile kwazise kade besicindezela ikakhulukazi esiwombeni sokuqala. Kwesesibili kade sebegcwala ngemuva kwebhola, benza namaphutha. Okubalulekile wukudlulela esigabeni esilandelayo,” kusho uDavids.