UMbatha kungenzeka aphelele e-India
ISILOMO somdlali odume eqenjini lesizwe lika-Under 20, uSibongakonke Mbatha, kungenzeka sigcine siphelele e-India kwiAtletico de Kolkata.
Isolezwe lihabule ngomthombo walo othembekile ukuthi uMbatha angase aphelele e-India. UMbatja ugcine ehluleke wancama ukuthola i-visa ngaphambi kokuthi kuvalwe iwindi lokuhwebelana ngabadlali.
“UMbatha ufake isicelo sokuthola amaphepha akhe amkhululayo kwi-Fifa. Ulindele ukuzwa imiphumela yesicelo sakhe ngoLwesine. Uma konke kuhambe kahle uzoya kodlala kwi-Atletico de Kolkata yaseIndia. Iqembu liphethwe yizikhulu ze-Atletico Madrid ezinamaqembu emazweni ehlukene,” kusho umthombo.
UMbatha (20), odabuka oLundi, ubolekisiwe kwiPlatinum Stars kodwa unenkontileka neBidvest Wits. Umdlali, oyibamba ezinhlangothini, ubegijima eqenjini lesizwe laseNingizimu Afrika likaUnder 20 ebelidlala kwiNdebe yoMhlaba ngonyaka odlule.
Kuthintwa imenenja kaMbatha, uPaul Mitchell, weSiyavuma Sport Agency, iyalele ukuthi kuthintwe iDikwena.
“Njengamanje uMbatha ukwiPlatinum Stars. Into ongibuza ngayo anginalo ulwazi lwayo. Awuthinte iPlatinum,” kusho uMitchell ngamafuphi.
UMbatha usedlale imidlalo eyisikhombisa kwiPlatinum kule sizini ka-2017/2018. UMitchell usenomlando wokuhambisa abadlali kwi-Indian Super League. USameehg Doutie, ogqame emaqenjini esizwe amancane, wahanjiswa nguyena uMitchell.
No-Ofense Nato waseBotswana oke wayibamba kwi-Wits watholelwa nguMitchell ikhaya elisha e-India. Bobabili basayine kwiAtletico de Kolkata.
Iligi yase-India izakhele igama ngokuholela abadlali izindodla zemali.
Khonamanjalo uMitchell uthel uKeagan Buchanan akanazo izinhlelo zokunqamula inkontileka yakhe neKaizer Chiefs njengoba egcine engakwazanga ukubolekiswa.