ULarsen usola abadlali basemuva
UGXEKE abadlali bakhe basemuva umqeqeshi weLamontville Golden Arrows, uClinton Larsen, ezakhe zikhishwa yiKaizer Chiefs kwi-Last 32 yeNedbank Cup ngeSonto.
I-Arrows iwashiswe ijezi yiChiefs ngo 3-0 wamagoli angene esiwombeni sesibili kaRyan Moon, Joseph Molangoane noBernard Parker eFNB Stadium, eNasrec. Ukuphuma kwe-Arrows kusho ukuqhubeka kokungenzi kahle kwaleli qembu emidlalweni yakamuva. Abafana Bes’thende bangelinye lamaqembu ayiqale kahle isizini okukhona kuwona iBaroka esigcine imise umqeqeshi uKgoloko Thobejane ngenxa yokungahambi kahle kwezinto.
Emuva komdlalo neChiefs, uLarsen uqhakambise ukuthi badlalise abadlali abasebancane kodwa wakhala ngabadlali bakhe basemuva ngokungenelwa yigoli lesibili elishaywe nguParker nobekukade kuyibhola elide abahlulekile ukulingqofa ngamakhanda wagcina lo mgadli esebhekana nonozinti.
“Sisebenzise lo mdlalo ukuklomelisa abadlali abenza kahle eqenjini lethu leMultichoice Diski Challenge (MDC). Kodwa ngicabanga ukuthi esiwombeni sokuqala, ngaphandle kwe-free kick ebingakwesokunxele, akukho iChiefs esithuse ngakho. Singenile ebhokisini layo kodwa sehluleka ukusebenzisa amathuba. Siye ekhefini kungu 0-0 kodwa ngicabanga ukuthi bekufanele siwasebenzise amathuba amathathu esiwatholile esiwombeni sokuqala,” kusho uLarsen.
“Esiwombeni sesibili ngiphoxekile ngendlela esingenelwe ngayo amagoli amabili. Elokuqala uNonyane (Lehlohonolo) kumiwe phezu kweqakala lakhe, walimala. Kuleyo khona edalekile, ngenxa yokuthi ubelimele, udukelwe nguKatsande ebhokisini ngoba ubengasakwazi ukunyakaza, iqakala lakhe selivuvukele. Igoli lesibili, simake ubumpuphu ngempela. Abadlali bethu bamaphakathi emuva beyobanga ibhola elilodwa.”
Ngaphambi kokuthi i-Arrows ihlulwe yiChiefs, kade ixetshulwe AmaZulu ngo 2-1 koweligi. Izobhekana neBidvest Wits koweAbsa Premiership ngoMgqibelo ngo-3.30 ePrincess Magogo Stadium, KwaMashu. Abafana Bes’thende basendaweni ka-12 kwilog ngamaphuzu angu-23 emuva kwemidlalo engu-20. “Besingathanda ukuwuwina lo mdlalo ukuze kuzobuya ukuzethemba kubadlali. Abanye bangathi kuyisibusiso ukuhlulwa ukuze sizobuyela emuva manje siyogxilisa imiqondo yethu emidlalweni engu-10 esele ukuze sizothola amaphuzu anele azokwenza sinyuke kwi-log. Siyakholwa ukuthi sizokwazi ukuphuma kulesi simo esikuso. Sidinga ukuwina kanye ukuze sibuyele kwi-Top 8 noma sibalwe namaqembu abanga ukungena kuyona. Sizoqhubeka nokukulwela lokho,” kusho uLarsen.
Kumasizini amane edlule i-Arrows ibingakaze iphume kwi-Last 32 kwiNedbank Cup. Ngesizini edlule ishaywe yi-Orlando Pirates ngo 1-0 kowandulela owamanqamu ePrincess Magogo Stadium. IBucs igcine ibhabhadiswe yiSuperSport United ngo 4-1 kowamanqamu eMoses Mabhida Stadium.
Amatsatsantsa a Pitori ngeke akwazi ukuvikela le ndebe okwesithathu kulandelana ngemuva kokukhishwa yiBloemfontein Celtic ngo 5-4 sekukhahlelwa amaphenathi ngeSonto.
Amaqembu azobhekana kwiLast 16 azoqhathwa ngoLwesine ngo-7.30 ebusuku.