Konke sekusezandleni zikaZuma ngesikhundla
INGCABHA isisele kuMengameli Jacob Zuma ngokwehla esikhundleni njengoba izolo isigungu esiphezulu se-ANC sinqume ukuthi simhoxise kuhulumeni.
UZuma, ongakaze asho ukuthi uyafuna noma akafuni ukwehla esikhundleni kulindeleke ukuthi acacise namhlanje njengoba lesi sinqumo salesi sigungu singaguquki.
Izolo ebusuku bekuthiwa uMengameli Zuma uzokhuluma nezintatheli namhlanje ngo-10 ekuseni e-Union Buildings, ePitoli.
Isigungu sinqume ukumkhomba indlela kuhulumeni ngoMsombuluko ebusuku ngemuva komhlangano odonse cishe ubusuku bonke ePitoli.
UNobhala-Jikelele we-ANC, uMnuz Ace Magashule, izolo utshele abezindaba ukuthi lesi sigungu sithathe isinqumo sokuhoxisa uZuma ngaphansi kwesigaba u-12.2.21.2 woMthethosisekelo we-ANC.
Uthe kuqale kwaxoxwa ngaphambi kokufinyelela kulesi sinqumo.
“Uma i-ANC inquma ukuhoxisa umuntu esuke imjubile, silindele ukuthi lowo muntu ahloniphe lowo myalelo. Silindele ukuthi umengameli aphendule kusasa (namhlanje), nginesiqinisekiso uzonibiza abezindaba akhulume ngalokhu,” kusho uMagashule.
Uthe uZuma akakaze atholakale enecala wathi abamsusanga ngoba kukhona akwenzile.
“Indaba imayelana nokuthi anikezele amandla kuMengameli we-ANC, uMnuz Cyril Ramaphosa njengoba sanquma engqungqutheleni yasePolokwane ngo2007 ukuthi uMengameli we-ANC kumele abe ngumengameli wezwe. Sizoyibheka engqungqutheleni yenqubomgomo indaba yokuthi kube nokuhambisana phakathi kokhetho lwe-ANC nolwezwe ukuze kungabi nesikhala esikhulu esiba khona uma sekukhethwe uMengameli we-ANC nowezwe,” kusho uMagashule.
Uthe kodwa amandla akwi-ANC okuyiyo ejuba abantu ezikhundleni.
Uqhube wathi uma uZuma ehla, uRamaphosa uzoba nguMengameli wezwe.
“URamaphosa nguyena ozothatha izintambo kuMengameli Zuma. Uma kumele kube nenkulumo ebhekiswe esizweni okungeyona into ephoqwa uMthethosisekelo ukuthi ibe khona uRamaphosa nguyena ozoyethula.”
UMagashule uqede ukuqagela obekukhona ngokuthi uma uZuma ehla ngabe ngubani ozoba nguMengameli wezwe njengoba ihlandla likaZuma liphela ngonyaka ozayo.
Uthe uZuma waphakamisa ukuthi ufuna ukuhlala izinyanga ezintathu kuya kweziyisithupha ukuze ethule uRamaphosa kwiBrics nakwiSADC.
“Yinto esavumelana nayo singubuholi obuphezulu kodwa sathi uma siya esigungwini esiphezulu safike sayichitha leyo nto sathi side kakhulu lesi sikhathi. UZuma ubekusho lokhu ngoba ethi i-ANC ibhekene nesikhathi esinzima wathi uyilungu elizithobile le-ANC yingakho ebenxusa ukuthi alulelwe isikhathi ngalezi zinyanga. Kodwa sibuyelile kuyena noRamaphosa sayomazisa ukuthi isigungu esiphezulu siyamchitha, sifuna ehle esikhundleni,” kuqhuba uMagashule.
Ebuzwa ngokuthi ngabe bazoyeseka eyenkulumo-mpikiswano yevoti lokungabuthembi ubuholi bukaZuma ephakanyiswe amaqembu aphikisayo ePhalamende, uthe ngeke baleseke leli voti.
“Akekho umuntu ovota ngonembeza, silandela okushiwo yinhlangano. Ngeke seseke isiphakamiso sokuthi uZuma achithwe ngevoti. Asikaze siyixoxe eyevoti lokungabuthembi ubuholi bakhe.” Uthe bazohambela izwe lonke bachazele amalungu enhlangano ngalesi sinqumo.