Uvalo kubadayisi bethola isidumbu sogwaziwe

Isolezwe - - IZINDABA - NONTUTHUKO NGUBANE

SEKUQUBUKE uvalo kubadayisi basedolobheni eMgungundlovu kulandela ukuzithela phezu kwesidumbu sinenqwaba yamanxeba okugwazwa.

Abadayisi bakule ndawo bazithele phezu kwesidumbu somuntu ongaziwa, iminyaka yakhe elinganiselwa kwengu-35, ngoMgqibelo emgwaqweni uBerg.

Lesi sidumbu kuthiwa sitholwe ngabadayisi abajwayele ukuhamba ekuseni namatrolley abo beyobeka izimpahla ematafuleni abo.

Okhulumela amaphoyisa KwaZulu-Natal, uCaptain Nqobile Gwala uthe kayaziwa imbangela yokubulawa kwalo wesilisa kodwa bakhona abasolwa ababoshelwe icala.

“Amaphoyisa aseMgungundlovu abophe abasolwa abane ngezinsolo zokubulala. Umufi utholwe enenqwaba yamanxeba okugwazwa.

Abasolwa baneminyaka ephakathi kwengu-23 no-25. Kulindeleke ukuba bavele eNkantolo yeMantshi yaseMgungundlovu maduze,” kusho uCaptain Gwala.

Umdayisi othinte Isolezwe kodwa wala waphetha negama lakhe ngoba esaba ukwenzakaliswa, uthe abazi noma baphephile yini.

“Imigwaqo eminingi edolobheni isiphenduke kwajomb’igazi ngenxa yezidumbu esizitholayo zabantu bebulewe. Okubuhlungu kakhulu wukuthi thina badayisi sifika ekuseni kakhulu futhi sihamba ebusuku ngenxa yamabhizinisi ethu. Siyesaba manje. Asazi noma kuphephile yini,” kusho umdayisi.

Isolezwe lithole ukuthi kuyinsakavukela ukugwazwa kwabantu ngezimpelasonto, ikakhulukazi emigwaqweni okukhona izindawo zokucima ukoma nalapho kugcwala khona amayengandoda.

Amaphoyisa athe ayaphenyisisa ngezigameko zokuhlaselwa kwabantu edolobheni.

Elinye iphoyisa elingagunyaziwe ukuba likhulume nabezindaba lithe babezitshela ukuthi ubugebengu buzoba ngcono ngokuvalwa kwendawo okuthiwa iseMatsheni.

“Ubugebengu sebuvele bakapakela nakwezinye izindawo. EMatsheni bese kuphenduke indawo okungasasondelwa kuyo. Manje izindawo eziningi ezingamakhona zihlaselwa wubugebengu ikakhulukazi ebusuku, ngezimpelasonto noma kuphele inyanga,” kusho umthombo.

Newspapers in Zulu

Newspapers from South Africa

© PressReader. All rights reserved.