Izinkakha zomhlaba nezimfijoli
KULINDELEKE ukuthi babheme bakholwe abathandi bezimfijoli ne-opera edilini lalo mculo elibizwa ngeKZN Philharmonic 2018 Summer Season ePlayhouse Opera, Theatre eThekwini, kusukela ngoFebhuwari 22.
Lolu chungechunge lwamakhonsathi olubophele izinkakha zamazwe ngamazwe futhi oluzophothulwa ngoMashi 15 luzobe lwenzeka ngoLwezine ngo-7.30 ebusuku.
Ingwazi yaseThekwini uBongani Tembe, eyiNhloko enguMqondisi wezobuCiko ezikhungweni ezimbili iKZN Philharmonic Orchestra neJohannesburg Philharmonic Orchestra, ithe isizini yakulo nyaka izokwethulwa njengedili lomculo we-orchestra elibizwa ngeWorld Symphony Series (WSS) eyasungulwa eThekwini eminyakeni engu-22 eyedlule.
“Ngijabule kakhulu ukuqhubeka nalo mcimbi osudumile iWSS kula ma-orchestra ukwenza isiqiniseko sokuthi siheha ababhidi nabaculi bamazwe ngamazwe, beshiyelana inkundla namaciko akuleli, emakhonsathini ethu aseThekwini naseGoli.
Ezihlabanini ezidume umhlaba wonke okulindeleke ukuba zihambele la makhonsathi kubalwa umbhidi ongumakadebona odabuka kwaIsrael kodwa osezinze e-USA uDaniel Boico, umdlali wophiyano wase-Ukraine u-Anna Dmytrenko, umbhidisi odabuka eCanada uKwamé Ryan, umbhidi waseNetherlands u-Arjan Tien, umculi ozinze kuleli uDaniel Röhn, Arjan Tien, uyise nendodana uMax Baillie (violin) no-Alexander Baillie (cello). Kwelinye igumbi lasePlayhouse elibizwa nge-Alhambra Room kuzoba nomcinjana ozobe uhambisana nokuhlomisana ngolwazi ngoLwesine phakathi kuka-6 no-6.40 ntambama okungenwa ngoR15.
Ngo-10 ekuseni kuzoba neSymphony Season Thursday ePlayhouse Opera Theatre, kungenwa kuyo ngoR35 abadala noR15 abafundi, okuyimali ebandakanya nenkomishi yetiye noma yekhofi. Lokhu kuzilolonga kokugcina kusiza abafundi ukuba bazi ngokuthi kusuke kwenzekani emakhonsathini nokujabulisa amaqembu asemphakathini nezaguga ezihlala emakhaya nabantu asebathatha umhlalaphansi.