Usomabhizinisi uncome ukuzinikela kwekhwaya
ENIKELA ngetekisi kwiClermont Choir, usomabhizinisi uMnu Vivian Reddy uncome ukuzinikela kwayo ekuthuthukiseni umphakathi.
UReddy, uSihlalo we-Edison Group nongumnikazi weSibaya Casino, unikele ngetekisi emuva kwesicelo seClermont Choir kwiSibaya Community Trust ngonyaka odlule.
Uthe bazimisele nokuqhubeka nokusiza zonke izinhlelo zokuthuthukisa abantu. Sebesebenzise ngaphezu kuka-R150 million ngalokhu. “Ngesikhathi ikhwaya ifika nesicelo ngabheka umsebenzi omuhle ewenzayo nokuzimisela kwamalungu ayo. Ngiyakholwa ukuthi ingazakhela igama kuyo yonke imiphakathi emhlabeni jikelele. Nginethemba lokuthi isazoqhakaza, iwine nezindondo. Siyakholelwa emphakathini waseThekwini namaphethelo, osesekayo ngokuvakashela iCasino, yingakho sithanda nokunikela ezinhlelweni zokuwuthuthukisa.”
UMnuz Mlungisi Ntombela obemele ihhovisi lemeya yeTheku, uNkk Zandile Gumede, uthe ikhwaya iphuma emphakathini ontulayo kodwa osunegama ngenxa yayo.
Umphathi wekhwaya, uMnuz Wiseman Mkhize, uthe baswele amazwi okuveza injabulo abanayo. Uthe baqala ukufaka isicelo kwiSibaya Community Trust ngesikhathi belungiselela umcimbi wokugubha iminyaka ewu-25 ikhwaya yasungulwa ngonyaka odlule.
“Sasilindele ukuthi iSibaya sizosixhasela umcimbi obungoDisemba kuphela kodwa samangala uma sekuvela nendaba yetekisi. Kuningi esasikubhalile esicelweni sethu, itekisi yayiphakathi kwakho. Sinamalungu awu-56 ekhwayeni, obekuba nzima ukuwathutha ngetekisi eyodwa esindala. Bekudingeka umshayeli aze alale ezintathatkusa ethutha amalungu ngoba sekukhona nahlala ngaphandle kwaseClermont,” kusho uMkhize.