Kushe ingoma kufungiswa uRamaphosa
“PHAKAMA Ramaphosa, ixesha lifikile”. Kuqhume le ngoma izolo ePhalamende ngesikhathi uMnuz Matamela Cyril Ramaphosa ekhethwa ngo-elethu kwesokuba ngumengameli wezwe.
URamaphosa ukhethwe ngaphandle kokuphikiswa ngamalungu ePhalamende emva kokusula kobengumengameli, uMnuz Jacob Zuma, wafungiswa izolo ntambama ngumengameli wamajaji uMogoeng Mogoeng.
I-EFF idube yaphuma ithi ayihambisani nokuqokwa kukaRamaphosa ifuna kuhlakazwe iPhalamende kusondezwe ukhetho.
Esekhethiwe uRamaphosa, amaqembu aphikisayo athe nakuba ezosebenzisana naye kodwa azoqhubeka aphakamise izinto ezingahambi kahle nafuna zilungiswe ezweni.
Umholi weDA, uMnuz Mmusi Maimane, uthe bazosebenzisana ukuze kuthuthukiswe umphakathi.
“Inkinga bekungeyena uJacob Zuma kodwa yi-ANC ebithule ingamkhuzi ezintweni abezenza. Ngiyakubongela ngokuqokwa kodwa sizobonana ngo-2019 (okhethweni),” kusho uMaimane.
UMnuz Narend Singh we-IFP, uthe umholi waleli qembu ubambeke eThekwini uDkt Mangosuthu Buthelezi, wangakwazi ukufika azohalalisela uRamaphosa.
Uthe kulokoza inhlansi yethemba kubantu bakuleli abangu-55 million wathi kodwa bazoqhubeka nokuphenya bafake ongqongqoshe imibuzo.
USolwazi Nhlanhla Khubisa, weNFP, obekhulumela umholi waleli qembu uNkk Zanele MagwazaMsibi, uthe liphezulu izinga lokungasebenzi kwabantu njengoba limi ku-26%.
Uthe kumele kwenziwe okuthile ikakhulu ezinhlanganweni ezingaphansi kukahulumeni.
Umholi we-UDM, uGeneral Bantu Holomisa, uthe akekho umholi ongasebenza eyedwa kudingeka basebenzisane ukuphucula umphakathi wakuleli.
Uthe kumele kuhlanganwe kudliwe inyama kusetshenziswane bengamaqembu ahlukene.
UMfundisi Kenneth Meshoe, we-ACDP, uthe uRamaphosa kumele akhumbule ukuthi akayena umengameli wamalungu e-ANC kodwa owabantu bonke bakuleli.
USotswebhu we-ANC, uMnuz Jackson Mthembu, uthe kuyabajabulisa ukubambisana ababe nakho namaqembu aphikisayo.
Uthe noma kukhona abadubile baphuma kodwa basebenzisane kahle nala maqembu.
URamaphosa uphendule uMaimane wathi makangajahi u-2019 ngoba bazobe behlangana naye njalo ePhalamende. Uthe ufuna ukuhlale ehlangana namaqembu aphikisayo into athi wayiqala eseyiphini likamengameli.
“Ngiyayithanda eyokuthi asisebenzisane sonke. Ngizohlangana nabo bonke abaholi bamaqembu ukuze sibakhe ubudlelwano,” kusho uRamaphosa ozokwethula inkulumo ebhekiswe esizweni namhlanje ntambama ePhalamende.
UNobhala jikelele we-ANC, uMnuz Ace Magashule, uthe bayabuthemba ubuholi bukaRamaphosa wathi uzoqhubeka nezinhlelo zokuthathwa komhlaba ngaphandle kwesinxephezelo, izinguquko ezinqala kwezomnotho neyemfundo yamahhala ezikhungweni zemfundo ephakeme.
Uthe kuzoliwa nendlala, ukungalingani kubuyiswe nesithunzi sikahulumeni nesezinkampani ezingaphansi kukahulumeni.
ICosatu, ANCYL, SACP nezinye izinhlaka zikwamukele ukuqokwa kukaRamaphosa.