Izinyembezi emndenini kaZuma
UKHALA mi izinyembezi oshade nomfowabo omncane wobengumengameli wezwe, uMnuz Jacob Zuma, uma echaza ngobuhlungu ababuzwa njengomndeni ngokuphuma kukaJZ esikhundleni sakhe.
Engxoxweni esibe nayo ngaphande komuzi kaZuma KwaNxamalala izolo, uNkk Sabani Zuma uthe imfikisela izinyembezi indaba yokuphuma kukaZuma esikhundleni.
“Cha bandla basihlukumezile, kade ubhuti (Zuma) aqala ehlukunyezwa, le nto abayenze kuyena yimbi ngoba bekumele bamlinde aqede isikhathi sakhe,” kusho uNkk Zuma.
Umyeni kaNkk Zuma, uMnuz Khanya Zuma uthe umfowabo uyilwele kakhulu i-ANC waze waya ekudingisweni njengoba esekhishwa kabuhlungu enhlanganweni.
“Bekumele bamlinde aqede isikhathi sakhe, uma eseqedile bambonge ngomsebenzi wakhe awenzile. Le nto eyenzekile siyibuka njengendlela yokudicilela phansi isithunzi sakhe,” kusho uKhanya ongumakhelwane kaZuma abahlukaniswe wuthango olubiyile naye.
Uthe uMengameli uCyril Ramaphosa akazi lutho ngomzabalazo njengoba esekwazi ukuqhuba umkhankaso wokukhipha uZuma.
“Siphatheke kabi ngempela, umfowethu saze sacishe samenzela umsebenzi wokuthi usashona singazi ukuthi usaphila noma cha ekudingisweni, izingane zami zizalwe engekho,” kusho uKhanya. Uthe ubona sengathi uRamaphosa uzothatha izwe alifake ehlathini.
“Njengoba esephumile umfowethu kumele sikhohlwe yindaba yokuthi umhlaba uyophinde ubuye, lobu buholi obukhona manje ngeke bukwazi ukululwa lolu daba,” kusho uKhanya.
Izolo, isigejana samalungu e-ANC besinkanise ngaphandle komuzi kaZuma sigxoba itoyitoyi kusukela ekuseni kwaze kwashona ilanga.
Bekukhona nobuholi benhlangano bendawo.
Amalungu e-ANC abegcwele kaZuma athe ahlangene ngenhloso yokuzozwakalisa intukuthelo yawo ngokuphuma kukaZuma esikhundleni.
Omunye wabebegxoba itoyitoyi, uMnuz Delani Nkosi, uthe bayasamukela isinqumo sokwesula kukaZuma kodwa abaneme ngendlela ashiye ngayo.
“Ibinkulu ingcindezi abefakwa yona, namanje sisazibuza ukuthi ngobani ababehlohla ubuholi obukhona ukuthi bumkhiphe?” kusho uNkosi.
UNksz Nozipho Shezi uthe bona bazoqhubeka nokumeseka uZuma yize engesiye umengameli.
“Kumele abuye uMsholozi (Zuma) azosisiza sikhulise inhlangano lapha eNkandla ukuze inqobe umkhandlu osezandleni ze-IFP,” kusho uNksz Shezi.
Phakathi kwabebeyigxoba bekukhona noNksz Sithandiwe Hlongwane ongumakhelwane kaZuma owakhelwa umuzi yi-EFF.
UNksz Hlongwane, oke waba yi-EFF osabuyela kwi-ANC, unqabile ukukhuluma nabezindaba.
Amalungu e-ANC abecula izingoma zomzabalazo evule nemisakazo ezimotweni ebezidlala izingoma zomzabalazo.
Enye yezingoma ebiculwa kakhulu ethi Asiphelelanga kushoda uZuma.
Nayizolo izimoto bezingena ziphuma kwaZuma.
Ngokusho kobuholi basendaweni, balindele ukuthi uZuma atheleke eNkandla ngempelasonto.