Nezitshudeni sezivuke indlobane eDUT
ukuthi ziphume. Umlilo wesiteleka uqale ukokheleka lapho njengoba izitshudeni bezibhokela ukuthi kuthiwa kazihlale kuphi njengoba ukufunda sekuqaliwe.
Izitshudeni zithe bakhona abaqalile ukufunda ngoLwesibili kodwa iningi alikaqali njengoba abantu okufanele bafundise besatelekile.
Izitshudeni ezisabhalisile zilinganiselwa ku-20 000 kwezingu-28 000 ezamukelwa yile nyuvesi minyaka yonke.
Abasebenzi bayo abangamalungu ezinyunyana ezintathu, iNehawu, Tenusa neNteu sekunamasonto amahlanu betelekile.
Abasebenzi bebefuna ukwenyusela umholo ngo-10%, manje sebehlele ku-8.25%, inyuvesi ibeka etafuleni u-6.25%
Ngesonto eledlule izingxoxo bezisingethwe ngumxazululi wakwaCCMA kodwa akukho okuvunyelwene ngakho.
Umengameli wesigungu sezitshudeni eDUT, uSphephelo Ngubane, uthe baphoxekile ngokuthi inyuvesi nezinyunyana kuze kube yimanje abakavumelani ngalutho.
“Siyizitshudeni siphazamiseke kakhulu ngalesi siteleka. Silahlekelwa yisikhathi sokufunda esingeke sisabuyiseleka. Ikota yesimesta isiphelile singazange sifunde. Sinovalo lokuthi kungenzeka kugcine kuphazamiseke yonke isimesta okuzoholela ekutheni kube nezitshudeni obekumele ziphothule izifundo zazo, ezingeke zisaqeda kulo nyaka. Kunezitshudeni ezingakangeni ezindaweni zazo zokuhlala. Kunezitshudeni okumele zenze izinhlelo zokukhokha izikweletu zazo ukuze zibhalise ezingakwazi ukwenza lokhu ngoba kutelekiwe,” kusho uNgubane.
UMnuz Alan Khan okhulumela le nyuvesi, uthe ezinye izinhlelo zokufunda kule nyuvesi ziqalile ngoLwesibili.
Uqhube wathi iqiniso wukuthi le nyuvesi ayinayo indawo yokuhlala zonke izitshudeni. Wathi abaholi bezitshudeni bazisiwe ngalokhu kodwa inyuvesi yenza konke okusemandleni ukusiza. Uthe njengoba sekuphele amasonto abasebenzi betelekile inyuvesi iphakamise ukuthi bangaholelwa abangasebenzile.