AbakaZuma bami noRamaphosa
UMBUZO NGOZOBA YIPHINI LIKA-CR
Mxolisi Manyathi Enquthu Yodumo: Mina ngingajabula ukubona kuba uNksz Dlamini Zuma noma uLindiwe Sisulu ke sibasebenzise abesifazane ezikhundleni eziphezulu singalokhu sithi izwe lethu likulungele ukuholwa owesifazane sibe sihluleka ukubenza amaphini omengameli.
Philani Luthuli: UDavid Mabuza uke wakuveza ukuthi akafuni ukuba yiphini likaCR. Ngisola ukuthi akafuni ukuba yingxenye yamaphutha azokwenziwa uCR ngoba phela naye zisazomnetha. Kodwa-ke angimboni uCR esebenza noNDZ imibono yabo yehlukene kakhulu. UZUMA USHIYE EKHONONDA Yolanda Bucslady WaMicho’SredojevicGasela: Vele ayikho into ayenzile noma ubani uma exoshwa unikwa izizathu zokuxoshwa kwakhe.
Bongani Thamsanqa Nxumalo: Ngisacela ukubona ukotshi ushipha-ke njengokusho kukankosikazi kaZuma. Awushiphe phela!!
UZANDI UCHAZA NGOKUFA KUKASENZO
Sporkes Mpahleni: Cha iqiniso selizovela la. Engifuna ukukwazi wukuthi wafika nini uyise kaLongwe ngoba angizwa ekhuluma ngaye. Ithe intombazane unina kaKelly noKelly babesizana befaka uSenzo emotweni kodwa uChicco uthe waba ngowokuqala ukufika kaKelly wambona uSenzo edindilizile, manje abantu besimame bafaka umuntu emotweni ekubeni ikhona indoda engaveli ngokwencazelo kaZandi? Ngiyema nkosi yenkantolo.
INDODANA yobengumengameli waseNingizimu Afrika, uMnuz Jacob Zuma, u-Edward Zuma, ithe uyise nawo wonke umndeni wakwaZuma bazokhankasela i-ANC emakhaya, emadolobheni nasemalokishini aseNingizimu Afrika.
“Sizosebenza kanzima ukuqinisekisa ukuthi i-ANC iyalunqoba ukhetho lwangonyaka ozayo. Sizobe sikhankasa nabaholi benhlangano, ngisho ubaba uzobe ekhona uma sikhankasa. Yize kunjalo ngihambisana nobaba ukuthi isinqumo sokumhoxisa ePhalamende asilungile futhi asinasisekelo. Sithathwe ngomoya ophezulu wanganikezwa izizathu zokumhoxisa,” kusho u-Edward.
Uthe ukholwa wukuthi abathathe lesi sinqumo bathobele umthetho wongxiwankulu abamhlophe abafuna ukudicilela phansi iNingizimu Afrika.
“Akufanele sivumele ukusetshenziswa ngabafana baseStellenbosch abenza sengathi bayalithanda izwe. Ngiyazi kukhona abazoyithatha kabi le nkulumo futhi ngikulindele ukuhlukunyezwa. Ngicela i-ANC nabantu baseNingizimu Afrika baqale uhlelo lokushintsha umnotho wezwe nokubuyisa umhlaba ngaphandle kwesinxephezelo. Ubaba unikele iminyaka yakhe engu-60 kwi-ANC futhi akasoze afuna kube khona abayixovayo besebenzisa igama lakhe. Asinamona, asinanzondo siyayithanda i-ANC,” kusho u-Edward.
Udonse ngendlebe amalungu ale nhlangano ukuthi angalokothi ayishiye kodwa aqhubeke nokuhlala kuyo yize uyise engasekho.
Esitatimendeni esithunyelwe kwabezindaba ngu-Edward, uthe babonile ukuhluka kwemibono emuva kokwesula kukayise, abanye bekhala ngokuthi bazoduba ukhetho luka-2019 futhi ngeke bayivotele i-ANC ngonyaka ozayo.
“Sikhathazekile ngokuzwa izinkulumo zabantu bethi ngeke bayivotele i-ANC, abanye kuthiwe kufanele bajoyine amaqembu aphikisayo. Sicela abantu abaphatheke kabi ngokususwa esikhundleni kukababa baziphathe kahle. Bangayidubi i-ANC ngoba naye uzoqhubeka nokuyisebenzela. Kufanele baqhubeke nokubambana,” kusho u-Edward.
Uthe i-ANC iyona ebumbe iNingizimu Afrika futhi akufanele kube khona abeza noqhekeko nabadala udweshu egameni likayise.
“Njengoba kungazange kube nodweshu ngesikhathi kuwa umbuso wobandlululo, akufanele luqale manje. Kufanele siqhubeke nokuphilisana ngoxolo.
Ungumuntu okwaziyo ukudala uxolo njengoba enza KwaZulu-Natal isimo sisibi futhi uyaqhubeka nokwenza lo msebenzi emazweni ase-Afrika,” kusho u-Edward.
Uthe amalungu e-ANC kufanele aseke ubuholi obusha ukuze kube nesisombululo odabeni lomhlaba, imfundo yamahhala kube nesigubhukane kwezomnotho.
“Siwumndeni wakwaZuma okuhlanganisa naye obengumengameli sizomeseka uMengameli Ramaphosa nabo bonke ubuholi be-ANC ukuze bunqobe ukhetho lwangonyaka ozayo.
Sigqugquzela abantu ukuthi babhalisele ukuvota ngoMashi 10 noMashi 11 baqinisekise ukuthi imininingwane yabo ilungile ngokuya ezikhungweni zabo ngo-8 ekuseni kuya ku-5 ntambama,” kusho u-Edward.