I-ANC izohlela imigubho yokwamukela uZuma eKZN
UZOKWAMUKELWA yi-ANC KwaZuluNatal ngemigubho obengumengameli wezwe uMnuz Jacob Zuma, ethi ushiye umlando omuhle kuhulumeni.
Le nhlangano ithi izobe igubha iminyaka engu-60 uZuma ayichithile esebenzela abantu bakuleli. Umxhumanisi wekomiti lesikhashana le-ANC esifundazweni uMnuz Sihle Zikalala, uthe akangabazi ukuthi uZuma uzoqhubeka asebenzele inhlangano.
“Kuzoba nemigubho. Sisazomemezela izinsuku zayo lapho sizobe sigubha ukusebenzela abantu bakuleli iminyaka eminingi. Sinxusa zonke izinhlaka nabantu ukuthi beze bazogubha ngamagalelo kaZuma,” kusho uZikalala esithangamini nabezindaba izolo eThekwini.
UZuma usule ngoLwesithathu ebusuku ngemuva kokuba isigungu esiphezulu se-ANC sinqume ukumhoxisa kuhulumeni.
UZikalala uthe akumnandi ukuhoxiswa kuhulumeni kodwa uma isinqumo sesithathiwe bayaseseka futhi ngesabo bonke.
“Isinqumo sethu lesi ngoba singamalungu esigungu esiphezulu se-ANC. Sizomeseka umengameli we-ANC uRamaphosa (Mnuz Cyril) ngoba kukhona abantu abazitshela ukuthi ngeke simeseke,” kusho uZikalala.
Uthe kuzoqhubeka ukukhula kwe-ANC noma uZuma engasekho sekunoRamaphosa.“Njengoba kuza ukhetho ngo-2019 sizophuma sonke siyokhankasela i-ANC ukuze iwine ngamalengiso. Amaqembu aphikisayo afuna kusondezwe ukhetho adlala ipolitiki, acabanga ukuthi sihlukene kanti akunjalo. Noma kungayiwa okhethweni manje sizowudla umhlanganiso.”
Uthe akulona isiko le-ANC ukuthi kumele kuxoshwe omengameli bezwe uma sekungene umengameli omusha we-ANC.
Ubale ezinye zezinto ezenzekile ngaphansi kobuholi bukaZuma okuwukusatshalaliswa kwemishanguzo yokuthithibalisa ingculazi nokutholakala kwayo emakhaya, ukuthuthukiswa kwezindawo zasemakhaya okubalwa ukufakwa ugesi, amanzi, ukuqalwa kohlelo lwemfundo yamahhala ezikhungweni zemfundo ephakeme, uqinisekisile ukuthi elakuleli liyahlonishwa ezinhlakeni ezifana neBrics, SADC ne-African Union.
Ubale ukufihlwa ngenhlonipho kowayengumengameli wezwe uMnuz Nelson Mandela nemidlalo yeNdebe yoMhlaba ngo-2010.