‘Luphelile usizi kubantu baseNingizimu Afrika’
IZAZI zomnotho zithi luphelile usizi kwabaseNingizimu Afrika emuva kokusula kukaMengameli Jacob Zuma okuholele ekusimameni kweRandi.
USolwazi Bonke Dumisa uthe izimakethe kudala zakulindela ukuthi uZuma ehle esikhundleni njengoba iRandi likhombise izimpawu zokusimama kusukela ngoDisemba 8.
“Izimakethe bezikulindele ukuthi uZuma asule kodwa ngesikhathi egoloza iRandi liye lantenga. Okumnandi kubantu wukuthi namhlanje iRandi sivuke lihweba ngoR11.71 okuyizindaba ezinhle ngoba lehlile kuR12. Ukusimama kweRandi kusho ukuthi ngeke sikhokhe kakhulu uma sithenga impahla kwamanye amazwe,” kusho uDumisa.
Uthe iRandi likhombisa ukusimama uma liqhathaniswa noPondo wase-United Kingdom njengoba likuR16.40 bese liba nguR14.59 uma liqhathaniswa ne-Euro yamazwe ase-Europe.
“Intengo yokumbiwa phansi nayo inyukile kodwa eyehlile eyeplatinum. Okuhle wukuthi intengo kawoyela ongahluziwe nayo iphansi okusho ukuthi kuzohamba kahle kwezomnotho. Ukusimama kweRandi kuhle ngoba kusho ukuthi abatshalizimali bazoza eNingizimu Afrika kuthuthuke umnotho bese kudaleka nemisebenzi,” kusho uDumisa.
Uthe izimakethe ziyamthanda uRamaphosa ngoba ungumuntu ohlonipha umthetho, okwaziyo ukuxoxisana nabantu njengoba ayesezingxoxweni zeCodesa ngaphambi kokuthi iNingizimu Afrika ibuswe ngentando yabantu futhi uyakuqonda nokukleliswa kwezwe yizinkampani ezibheka umnotho emazweni ahlukene.
UDkt Azar Jammine oyi-chief economist kwa-Economterix uthe luphelile usizi kubantu baseNingizimu Afrika njengoba iRandi lisimeme.
“Ukusimama kweRandi kusho ukuthi luphelile usizi kubantu ngoba abatshalizimali bazoza nemali yabo bazoyifaka emnothweni wethu. Uma kuza abatshalizimali kudaleka amathuba omsebenzi, kukhule umnotho,” kusho uJammine.
Uthe bathemba ukuthi umnotho uzosimama kodwa lokho kusezandleni zikamengameli omusha nezinqumo azozithatha.