Iphinde yafakwa enkantolo iDelangokubona
INHLANGANO yosomabhizinisi ezakhele udumo ngokufuna amathenda ngenkani, iDelangokubona Business Forum, isiphinde yafakwa enkantolo ngokuvimbela umsebenzi wokulungiswa komgwaqo waseSani Pass, ezintabeni zoKhahlamba.
Inkampani iLoemat Construction, emelwe ngabakwaCox Yeats, iye enkantolo eNkulu eThekwini ikhala ngokusatshiswa kwabasebenzi bayo nosonkontileka abancane esebenzisana nabo, ngamadoda angaziwa.
Iveze ukuthi ukusatshiswa kwayo sekuholele ekuphazamisekeni komsebenzi ngoba yesaba ukuthi abasebenzi bayo bazolinyazwa.
Esitatimendeni esifungelwe, isikhulu esiphezulu sakwaLeomat uMnuz Johan Claasens, siveze ukuthi sekube nezigameko eziningana zokusatshiswa ngabantu abenzisa okwezigebengu befuna umsebenzi ngenkani.
Uthe amalungu eDelangokubona afika endaweni abasebenzela kuyona abatshela ukuthi abayeke ukusebenza futhi azimisele ngokufa uma enganikwa umsebenzi.
“Izinsongo zabo yizona ezisilethe lapha enkantolo. Ukuma komsebenzi kusho ukuphazamiseka komphakathi ozohlomula ngokuthuthukiswa komgwaqo ohlanganisa iNingizimu Afrika neLesotho. Lo mgwaqo uzolekelela kakhulu ohlelweni lokwakhiwa kwedamu elizoba namanzi azosetshenziswa kula mazwe,” kusho uClaasens.
Uthe ithenda bayithola ngoEphreli 2016 baqala ukusebenza ngoJulayi wonyaka odlule kodwa kwama umsebenzi emuva kokuthi bephazanyisiwe, baphinda baqala ukusebenza ngenyanga edlule.
Uthe uthole ucingo komunye wabasebenzi ekhala ngokuthi kunamadoda amathathu afike ephethe iziqwayi endaweni abasebenzela kuyo ebaphoqa ukuthi bayeke ukusebenza.
“Laba bantu batshele abasebenzi bethu ukuthi abayeke ukusebenza futhi baphume esayithini. Babasabise ngokuthi uma bengayeki basengozini yokufa. Bekukhona nemoto ebivimbe ezinye ukuthi zingene lapho sisebenzela khona. La madoda abesabisa wonke umuntu,” kusho uClaasens.
Uthe onogada babo bathinte amaphoyisa kanti amadoda abesabisa atshele amaphoyisa ukuthi angamalungu eDelangokubona.
Athe afuna umsebenzi yize uMnyango wezokuThutha uqinisekise ukuthi u-30% wenkontileka unikezwa osomabhizinisi abancane bendawo ngokusho kukaClaasens.
Uthe amalungu eDelangokubona athe akekho ozosebenza aze athole umsebenzi.
“Sithole incwadi ebavimbela ukuthi basisabise ngoLwesibili kodwa ngithe uma ngiya endaweni esisebenzela kuyo ngathola indoda ezibize ngomkhulumeli weDelangokubona yathi kufanele sihlale silindile ngoba izotshela amalungu ayo ukuthi asilaleli futhi azimisele ukufela izimfuno zawo,” kusho uClaasens esitatimendeni esifundwe enkantolo.
Icala liqale ngoLwesithathu kanti iLoemat ithole enye incwadi evimbela iDelangokubona ukuthi iphazamise umsebenzi. Icala lizobuyela enkantolo ngenyanga ezayo.
IDelangokubona ayitholakalanga ukuba iphawule izolo.