Sekunodokotela abasha bomdlavuza
ukulashelwa umdlavuza.
“Kuyasijabulisa ukuthi iziguli eziqala ukwelashwa ezingaphezu kuka-150 nebeseziqalile ezingu-300 ngenyanga, sezinakekelwa kulesi sibhedlela. Labo dokotela abayisipesheli sebezibophezele ekutheni bazoqala ukusebenza ngokushesha njengoba lesi sibhedlela sinemishini emithathu yokulapha umdlavuza,” kusho uDhlomo.
Lo mnyango ube ngundabamlonyeni emuva kokuphuma kombiko wekhomishini elwela amalungelo abantu, iSouth Africa Human Rights Commission (SAHRC) owadalula izinkinga ngokulashwa komdlavuza kulesi sifundazwe. Ezinye zezinto ezavezwa yilo mbiko ukuthi iziguli zilinda izinyanga ezinhlanu ukuze zibone udokotela oyisipesheli owelapha umdlavuza.
UDhlomo uthe lesi sivumelwano sabo nodokotela bakulesi sikhungo sizonciphisa isikhathi esilindwa yiziguli ukuze ziqale ukulashwa. Kulindeleke ukuthi iziguli zilinde isikhathi esilinganiselwa emasontweni ayisithupha kuya kwayisishiyagalombili.
Uthe labo dokotela bafika nje ikhona imizamo esiyenziwe yisifundazwe ukuqinisekisa ukuthi izinhlelo zokwelashwa komdlavuza zisesimeni esifanele.
Uveze ukuthi esibhedlela saseGrey’s eMgungundlovu kunodokotela abayisipesheli abane nomshini wokulapha umdlavuza owodwa. Lesi sibhedlela sinakekela iziguli eziqalayo ezingu-140 neziphindayo ezingu-500 ngenyanga. Phezu kwalokhu lesi sifundazwe singesesithathu ezifundazweni ezinemishini eminingi yokwelapha umdlavuza.
Udalule nokuthi bamatasa baqeqesha odokotela abazoba ngodokotela abayisipesheli abelapha umdlavuza.
UDhlomo unxuse amalungu omphakathi ukuthi akusukumele ukuhlolela umdlavuza ngokushesha njengoba ethe lokhu kubabeka ethubeni elihle lokuthi bakwazi ukulashwa.
Izolo labo dokotela abelapha umdlavuza okukhona kubo uDkt Wezile Chitha wesikhungo semfundo ephakeme i-University of the Witwatersrand, uDkt Itumeleng Funani noDkt Victor Litlhakanyane bazibophezele ekutheni bazokwenza konke okusemandleni abo ukuletha ushintsho ezinhlelweni zokwelapha umdlavuza kulesi sifundazwe.
UDkt Litlhakanyane, ongudokotela oyisipesheli ohola ithimba lodokotela abelapha umdlavuza abahlanu, uthe bakujabulele ukuthola ithuba lokusiza uMnyango wezeMpilo.
Uthe nethimba lakhe likujabulele ukuba yingxenye yalolu hlelo njengoba abanye babo bebekulesi sifundazwe befisa ukuthola ithuba lokubuya bazofaka isandla ekulashweni komdlavuza.
“Sifuna ukusiza umnyango ukuthi ubuyele ezingeni elalikuwona lokuqeqesha odokotela abelapha umdlavuza,” kusho uDkt Litlhakanyane.
Labo dokotela kulindeleke ukuthi baqale ukubona isiguli sabo sokuqala ngoMsombuluko.