Asizihluphe ngokufunda ezinye izilimi
UYIHLABE esikhonkosini uNgqongqoshe wezamaSiko nobuCiko KwaZulu-Natal, uNkk Bongi Sithole-Moloi, ngekhwelo lokuthi kufundwe izilimi ezahlukahlukene.
Uhlabe ikhwelo engqungqutheleni yeLibraries, Languages, Archives and Museums, esongwe ngoLwesithathu nedonse izinsuku ezimbili eThekwini.
Ingqungquthela ibigxile ekubhungeni ukwazisa nangokugcinwa kolimi, umlando namagugu.
Njengephephandaba elizigqaja ngokuqhakambisa ulimi lweSiZulu siyakugcizelela ukuthi kusemqoka futhi kuhle ukuzigqaja ngolimi oluncele ebeleni kepha kuyasiza nokuzihlomisa nangezinye izilimi.
ENingizimu Afrika kunezilimi eziwu-11 ezisemthethweni kepha kukhona abantu abakwazi ukukhuluma izilimi ezimbili kuphela abanye olulodwa vo.
Bakhona abakulesi simo ngesizathu sokunqindeka ukufunda kepha bakhona nalabo abafundile baze bafinyelela nasemazingeni aphezulu kodwa abangazixaki ngokufunda ezinye izilimi.
Ezifundazweni eziningi zakuleli kuba nolimi oluchumayo, olukhulunywa yiningi labantu kodwa uyaye uthole ukuthi kunabantu asebehlale isikhathi eside abanye abazalelwe kuso leso sifundazwe kodwa abangazixaki ngokufunda lolo limi.
Lokhu sikubona kuhambisana nokubukela phansi lolo limi njengoba noNkk Sithole-Moloi ekugcizelela ukuthi abantu mabangacabangi ukuthi ulimi abalukhulumayo yilona olusemqoka ukwedlula ezinye izilimi.
Lokhu siyakugcizelela nathi ukuthi mazihlonishwe zonke izilimi futhi kumele sikuqede nokuhlekisa ngabantu ababhidilisha ulimi oluthize ngoba bengaluncelanga ebeleni.
Siyasithakasela futhi siyavumelana nanesiphakamiso esiphinde saqhamuka kule ngqungquthela sokugqugquzela ukuthi kufundwe ukuxhumana nalabo abayizithulu.
Kumele sonke sizihluphe ukukwazi ukukhuluma ngezandla ngoba kubalulekile ukukwazi ukuxhumana nabantu ngezilimi ezehlukene.