Kwenziwa yini sibe nomengameli wezwe bese siba nomama wesizwe?
MHLELI: Ngisengumfana omncane ofuna ukukhuliswa ngokolwazi ikakhulukazi ngokwesintu sakithi kwaZulu.
Nginokudideka ikakhulukazi uma ngilalele izindaba, uzwe umethuli wazo ekhuluma ngokuthi umama wesizwe ebe esho inkosikazi kamengameli, kepha umengameli sithi umengameli wezwe.
Bese ngizibuza ukuthi amakhosikazi eSilo wona omama bani?
Ngokolwazi lwami oluncane ngazi ukuthi isizwe wuhlangothi lwabantu abakhuluma ulimi oluthile ikakhulukazi ngokwesiNguni.
Bese izwe sikhuluma lapho abantu bezilimi ezihlangene bebuswa wumengameli othize njengoba iNingizimu Afrika iyizwe hhayi isizwe.
Bengingathokoza uma umfo kaTshathugodo noNgizwe Mchunu bengayikhuluma le ndaba njengabantu abanolwazi ngezinto zesintu.
Ngiyacela basakazi ke nisibuyise nakhu silahleka olwimini lwethu, asazi nalezi zingane eziza ngemuva sizozifundisani ngoba into ezwakala emsakazweni bayibona kuyiyona elungile kepha le yesizwe nezwe iyadida.
Umengameli uma engamele izwe kusobala unkosikazi wakhe umama wezwe hhayi wesizwe.
Isizwe sibuswa ngamakhosi ngokwazi kwami njengoba ngishilo ngathi ngiselinkonyane elisancela bengingathokoza kubafundi uma ekhona onolwazi oluhlukile kimi angisize. Ngiyathemba abafundi ngeke bagcine ngokusiphendula uma kungukuthi esikubhalile kubathunuka izilonda.
Okokugcina iSwazini iyini yizwe noma yisizwe? Isezithebeni.