Kungathi kudayiswa nezimpukane eSpar eMkhuze
Mpha Shabalala EMNAMBITHI MHLELI: Kwelakho eliwela umfula ugcwele. Ngithi ake ngikhuze nawu umhlola esibhekene nawo esitolo sakwaSpar eMkhuze.
Ngiyafisa ukuthi abezempilo nabezenhlanzeko yezitolo nabavikeli babathengi bangenelele.
Kulesi sitolo sakwaSpar eMkhuze ubunuku obukhona buyesabisa futhi badayisa nezinto esezidlulelwe yisikhathi.
Ekudleni okudayiswa khona okuphekiwe kundiza izimpukane ungafunga ukuthi nazo ziyadayiswa. Ukudla akumbozwa ngendlela.
Emafrijini abo maningi amathuba okuthola izinto esezidlulelwe yisikhathi nasekudleni okungaphekiwe. Uma ukhala kwimenenja yakhona ivele ithi hamba uyothenga la uthanda khona. Umbuzo engizibuza wona wukuthi ngabe abayikhathalele yini impilo yomuntu omnyama noma yingoba bazi ukuthi izitolo ezikhona kuleli dolobha zincane?
Ngibhala nje kuthe ngomhla ka-27 Januwari 2018 ngathenga u-castor oil khona. Ngathi uma sengizowuphuza ngabheka i-expiry date, ngathola ukuthi usudlulelwe yisikhathi. Ngabuyela khona ngiyokhala esitolo. Saya la engiwuthathe khona nezinye izimenenja sathola ukuthi wonke obukhona usudlulelwe yisikhathi. Okubuhlungu kunakho konke wukuthi baphinde bazifakele i-expiry date ngaphansi kwale endala. Wadlulelwa yisikhathi ngo-31 Disemba 2017 bona base befaka elinye iphepha elithi uzodlulelwa yisikhathi ngo-31 Disemba 2021.
Ngicela lusukunyelwe lolu daba. MS Mazivila EMLINGO-MKUZE