Asifunde ukwamukela izinqumo zabaqeqeshi
MHLELI: Singabathandi bezemidlalo, ikakhulukazi unobhutshuzwayo, kumele sizifundise ukulinda izinqumo ezithathwa abaqeqeshi bamaqembu ngokwehlukana kwawo. Kodwa siyaxhamazela, sibacindeze kungenasidingo.
KwiKaizer Chiefs kuthengwe abadlali abathathu okunguCastro, Ntshangase noMahlasela, olimele okwamanje, ngesikhathi kuvuleke iwindi lokudayiselana ngoJanuwari. USteve Komphela ubelokhu ethatha kancane ngesiwombe sesibili kulabo abakhona abasanda kuthengwa. Ubezivikela ngokuthi abakabi qatha ngokwanele ukuthi bangaqala umdlalo kwazise kunengqinamba ngokwahlukana kwabo.
Kwenzekile-ke wabaphonsa emphandlwini wamabhubesi (bebhekene ne-Arrows) baqhwantuza-ke inkonyane ithuka isisinga kwazise kusekude phakathi kwabo nendlela egculisayo yokuqala imidlalo baze bayiqede.
Ubexinwa, ejojwa, kubuzwa umbuzo othi: “Kungani engabaqalisi imidlalo?” Ngibonile-ke mina ukuthi kungani ebenza abekwenza kubona bobabili uCastro no Ntshangase. Abakakulungeli ngokwanele ukumelana nengcindezi eza nokufaka ijezi leziMpofana nokudlala phambi kwezinkumbi zabalandeli bazo.
Asizifundiseni ukwamukela izinqumo zabaqeqeshi bamakilabhu esiwathandayo, siyeke ukuthanda ngezinhliziyo. Asikhuleni sivuthwe ngokomqondo. Mxolisi Zuma MHLELI: Ngicela ukufakazela omunye wabafundi obhale kwelomhla ka-24 kwephezulu ekhala ngesikole uMuzokhanyayo High.
Muhle umsebenzi owenziwa ngothisha siyabonga kodwa ukuze bangapheli amandla kudingeka abaphathi bezemfundo bababhekelele. Isakhiwo asigculisi, kuyanetha, kunjalo nje phansi kuwubhuqu kunzima ngisho ukushanela.
Sesibonga othisha ngokuzinikela ngabe asisaziyisi nezingane kuso manje silandela imfundo. Okunye usungafika umnyango uzozibonela. Khanyisile Zwane EFULATHELA ESIHLAHLENI