Kunezikole ezigoloza uku-oda izincwadi
UMNYANGO wezeMfundo KwaZulu-Natal uthi kunezikole ezigoloza uku-oda izincwadi zabafundi noma sezikhunjuzwe izikhawu eziningi.
Isikhulu ehhovisi lenhloko yomnyango, uMnuz Thami Mbanjwa, sithe lezi zikole baziyalela ukuthi zi-ode izincwadi ngonyaka odlule ungakapheli kodwa zona zangakwenza lokhu.
Uthe ezinye zazo bagcina ngokuthi bazi-odele lezi zincwadi, ezinye baziphuca amandla okuzithengela izincwadi ngoba imali yezincwadi yayiphezulu kakhulu uma kuqhathaniswa nemali okuthengwa ngayo izincwadi ezikoleni ezithengelwa ngumnyango.
Zingu-3 121 izikole ezithengelwa ngumnyango izincwadi, ezingu-2 729 ziyazithengela izincwadi.
Lezi ezithengelwa ngumnyango kusetshenziswa inkampani esabalalisayo iNdabase Printing okuyiyo eyathola ithenda yokwenza lo msebenzi.
“Kuvulwa izikole, ezingu-43 zibike ukuthi zishodelwa yizincwadi. Lezi zikole zayalelwa ukuthi zabe izincwadi ezikhona ngokulingana ngoba izincwadi zazo zizofika.
Nyakenye kube nesikhalo kwezinye izikole ezizithengela izincwadi esithole ukuthi ibiphezulu kakhulu imali yokuthenga izincwadi uma siqhathanisa nalezo esizithengela izincwadi,” kusho uMbanjwa.
Uthe zingu-965 izikole abagcina ngokuthi bayimise imali bangayifaki bacela usizo lweNdabase ukuthi ibenzele lo msebenzi.
UMbanjwa usho lokhu nje izinyunyana zothisha nezikole ezizithengela izincwadi zakhala ngokuthi umnyango wagodla imali yokuthenga izincwadi wanquma ukuthi zithengwe yiwo.
Uthe ngumnyango owacela iNdabase ukuthi yenze lo msebenzi ngoba idiliva kuphela izincwadi ezikoleni ezithengelwa ngumnyango hhayi kulezo ezizithengelayo.
“Ngeke sivume ukukhokha imali enkulu ngezincwadi. INdabase yakwenza mahhala, ayizange isibize mali ukusibhekela indaba yalezi zincwadi. Minyaka yonke asi-odi izincwadi ezisuke zingekho sisuke sengeza kulezo ezikhona vele ezikoleni,” kusho uMbanjwa.
Uthe ezinye zezikole ziletha ama-oda azo sekudlule isikhathi okubanika inkinga ngoba zigcina zifike sekudlule isikhathi ezikoleni.