Imeya ixolisa ngogesi ezikoleni
IMEYA yeTheku uNkk Zandile Gumede isixolisile ezikoleni ebezicishelwe ugesi ngenxa yezikweletu, yagcizelela ukuthi kwakungeyona imvume yayo.
UNkk Gumede ubekhuluma kuleli sonto emhlanganweni wesigungu esiphezulu kuMasipala weTheku. Isolezwe like labika ngengwadla yokucishwa kukagesi ezikoleni okubalwa kuzo uMlazi Com-Tech High, okuthiwa bakweleta imali elinganiselwa kuR4 million. Emuva kwezikhalo zabazali balesi sikole, imeya yaba nomhlangano nothishanhloko bezikole ezithintekayo mayelana nalolu daba. Imeya ikuqinisekisile ukuthi izikole ezingu-30 ebezicishelwe ugesi sezivulelwe.
“NjengeMeya yeTheku ngangingazi lutho ngokucishwa kukagesi ezikoleni. Ngisho iPhini leMenenja ehhovisi likaMgcinimafa, uMnuz Krish Kumar, ubengazi. Sibe nomhlangano wezikole ezithintekayo ukuze siqonde kahle ukuthi yiziphi izinkinga ezibhekene nazo ukuze sisingathe kahle lolu daba,” kusho imeya.
UNkk Gumede uthe sekujutshwe izithunywa zikamasipala ukuze zixazulule lolu daba lwezikole.
“UKrish uzosingatha lolu daba bese ebuyisa impendulo. Ngifuna ukugcizelela ukuthi kumele kulandelwe kahle imigudu efanele uma abantu benesikweletu. Kumele ngazi uma kukhona izinqumo ezinkulu njengokucishwa kukagesi. Ngiyaxolisa kakhulu ezikoleni ezithintekile. Kumanje izimenenja esifundeni uMlazi nePinetown ziyalulungisa lolu daba.”
Imeya iveze ukuthi izohlangana noNgqongqoshe wezeMfundo esifundazweni uMnuz Mthandeni Dlungwane mayelana nodaba lwezikole ezikweletayo. Igcizelele ukuthi izikole ezintulayo akumele zicishelwe ugesi namanzi yingakho sekujutshwe neNhloko eBambile ophikweni lukagesi, uMnuz Maxwel Mthembu, ukuthi ibhekisise lolu daba. Ithe bazolandela nosomabhizinisi abasoleka ngokukweleta ukuze bakhokhe.
Okhulumela uMnyango wezeMfundo KwaZulu-Natal, uMnuz Sihle Mlotshwa, uthe zikhona izingxoxo ezihlanganisa nongqongqoshe mayelana nalolu daba. Uthe yize engakwazi ukudalula usuku lomhlangano phakathi kwemeya noDlungwana kodwa emhlanganweni odlule kwavunyelwana ngokuthi kwenziwe izinhlelo zokukhokha izikweletu.