Kuthenjelwe kuBantwana kwiNdebe yoMhlaba
LITHWESWE isiphambano sokwesula izinyembezi zokwehluleka kweBafana Bafana wukuya kwiNdebe yoMhlaba iqembu lesizwe lamantombazane laseNingizimu Afrika lika-Under 17.
Iqembu lisalelwe umdlalo owodwa ukulwela ukuzibekisela indawo kulo mqhudelwano omkhulukazi ose-Uruguay ngoNovemba.
Abantwana bazodudulana neMorocco kusasa emlenzeni wesibili ngemuva kokunqoba owokuqala ekhaya ngo 5-1 emasontweni amabili edlule. Umdlalo useStade Boubker Aamr, eSale ngo-4.30 ntambama ngokwesikhathi sakuleli.
Umengameli weSafa, uDanny Jordaan, enkulumeni efakwe kwiwebsite yale nhlangano ayenze ngesikhathi evakashele iqembu ngoMsombuluko, ubadonse ngendlebe abadlali ngokuthi bangazitheli ngabandayo.
“Niyiqembu elingakwenza lokhu okuhlule iqembu lika-Under 20, iBanyana Banyana neBafana Bafana ehluleke emidlalweni yokugcina. Uma nenze njalo nizosilethela ukumamatheka futhi sizobe sinilindile esikhumulweni sesindiza uma senibuya,” kusho uJordaan.
Iqembu lika-Under 20 iBasetsana lishaywe yiNigeria ngenyanga edlule emzuliswaneni wokugcina wokuhlungela umqhudelwano oseFrance. IBanyana yahluleka ukuya eCanada ngo-2015 kanti iBafana ayilubhadi eRussia ngoJuni ngemuva kokuqeda emsileni eqoqweni layo ishaywa iSenegal neCape Verde emidlalweni emqoka.
UJordaan uthe akufanele bayithathe kancane iMorocco ngoba nakhu bayishaya.
“Ngiyanizwa nikhuluma ngokubashaya ngo 7-0 kodwa kumele niqaphele. Akekho umqeqeshi ongashaywa ngo 5-1 bese ephinde ebophela iqembu elifanayo uma esedlalela ekhaya. Ninemizuzu ewu-90 ukuya kwiNdebe yoMhlaba okuwumqhudelwano wamaqembu aphezulu. Uma niya khona kuzosho ukuthi nani nibalwa nabadlali abaphambili emhlabeni.”
UJordaan, obe ngumengameli weSafa ngo-2013, uzophinde angenele ukhetho oluzoba ngoMashi 24
Ubuye wathembisa ukuqala kweligi kazwelonke yabesifazane, athe kuhambisana nezinhlelo zeFifa zokwakha iWorld League yamaqembbu abesifazane ahamba phambili emhlabeni ngo-2020.
Uthe emhlanganweni abewuhambele e-Oman ngesonto eledlule kuvele ukuthi i-Afrika izonikezwa izikhala ezimbili kulo mqhudelwano.
“Okwamanje iNigeria neGhana yiwona amazwe aphambili, okusho ukuthi kufanele sishaye bona ukuze nathi sizibekisele indawo kulo mqhudelwano. Leli yithuba eliyingqayizivele kinina,” kusho uJordaan.