I-Cell C Sharks neLions esitikini
UMZULISWANO wokuqala weVodacom Super Rugby oholwa umdlalo omkhulukazi wabakhaya i-Emirates Lions neCell C Sharks kusasa ngo3.05 ntambama, e-Emirates Airlines Park, eGoli, yiwona ozohlahla indlela ngeqembu elizothwala amathemba eNingizimu Afrika kule sizini.
Kumasizini amabili edlule iLions isifinyelele kowamanqamu kabili. Okuqaphelekile ngokukhonya kweLions wukuthi ibizidlela amahlanga emaqenjini akuleli. Kulokhu yiSharks ebhekwe ukuba ithwalise kanzima leli qembu laseGoli elilinyalelwe abadlali abamqoka.
Okwenza iSharks ithwalwe ngeqoma ukuthi izohamba ibanga elide wukulandwa kwenkakha yomqeqeshi ozakhele igama esekuMabhobhoko nakuyona iSharks uDick Miur. Lo mqeqeshi uyena obheke abadlali basemuva lapho iSharks igqishe khona ngekhono, isipiliyoni nakho konke okudingekayo kwazise lo mqhudelwano ukuhlanganisa nama-All Blacks, Wallabies, Pumas bese kuba ezaseJapan.
Kubadlali iSharks egabe ngabo singabala uRobert du Preez Jr indodana yomqeqeshi uRobert du Preez Snr, Makazole Mapimpi, Lukhanyo Am, Sbu Nkosi noLwazi Mvovo. Nakuba kukhalisa ukubekwa kukaCurwin Bosch ebhentshini kodwa indodana yomqeqeshi ikhombise ukuthi izoba eyayo le ndawo emidlalweni yokuzilolonga. Nakuba kunjalo kodwa ukuba noBosch ebhentshini kuyisibusiso ngoba uyakwazi ukudlala kwi-flyhalf kodwa nakwi-fullback ukunika into ecokeme ngendlela efanayo.
Kulo mdlalo weSharks, iLions izobe iholwa uWarren Whiteley ongukaputeni nakumaBhokobhoko kodwa obengadlali ngenxa yokulimala.
“Okunzima ukuhlanganisa isikimu sabadlali abangu-23 uma bonke abadlali bakho bekhombisa izimpawu zokukulungela ukudlala. Indlela abasondelene nabazwana ngayo ingiqinisa idolo.”
“Bonke balitholile ithuba emidlalweni yokuzilolonga. Inkinga isele nami manje. Angikwazi nokubabuka emehlweni abadlali engibashiye ngaphandle ngoba bonke basebenze ngokuzikhandla ngendlela eyisimanga. Sikulungele ukuqala neLions,” usho kanje uDu Preez esitatimendeni esithunyelwe yiSharks.
Ujobelele ngokuthi iqembu elizodla umhlanganiso kulokhu elinesikwati esibunjwe ngobuhlakani.