UHunt ufihle induku emqubeni ngowe-Arrows
UFIHLE induku emqubeni ngesikimu azosibophela emdlalweni we-Absa Premiership neLamontville Golden Arrows umqeqeshi wompetha beligi iBidvest Wits, uGavin Hunt, omelwe ukuhlelela umdlalo womlenze wesibili weCAF Champions League, eMauritius ngoLwesithathu.
UHunt ohlalelwe wumqansa wokususa iWits endaweni embi ehleli kuyona ngesikhathi esifanayo aqinisekise ukuthi okungenani iyangena kweyamaqoqo yeChampions League, kufanele enze izinqumo ezinzima ngesikimu azosibophela kulo mdlalo okusasa ngo-3.30, ePrincess Magogo Stadium, KwaMashu.
Ezimbi kuHunt ngezithi ngeke abe nalo ithuba lokumsebenzisa uVincent Pule kulo mdlalo ngoba usesigwebeni samakhadi. Lokhu kungaba yisibusiso kuyena ngoba ithuba lokumsebenzisa kowePamplemousses SC ngoLwesithathu likhona.
Lo mqeqeshi obebophele isikimu esibunjwe ngenqwaba yabafana abancane kowomlenze wokuqala, kulindeleke ukuba ababuyise bonke abebengadlali esingabala kubona uJames Keene, Lehlohonolo Majoro noThulani Hlatshwayo ukukha nje phezulu.
“Angazi ukuthi yibaphi abadlali engizobabophela kulo mdlalo kodwa iwini iyona engiyiyela eThekwini. Ngiyazi ukuthi ngeke kube lula kwazise sivele sihlaselwe yibhadi engingeke ngikwazi ukulichaza. Engikuthandazelayo ukuthi amathuba esiwakhayo siwasebenzise. Kule sizini sihleli kabi kwi-log nje yingoba sinebhadi hhayi ngoba kuwukuthi sidlala umbhedo,” kusho uHunt.
Umdlalo womlenze wokuqala iWits iwunqobe ngamagoli kaKobamelo Kodisang no-Eleazar Rodgers. Okungenza uHunt asibophele siqine ngokukhululeka isikimu sakhe ukuthi vele iPamplemousses ayizange ikhombise izimpawu zokuba yingozi.
Okuzokwenza lo mdlalo uconsise amathe ukuthi ozonqoba kuwona uzosondelana kakhulu kumbe azithole ekwiTop 8 uma eminye imiphumela ibavuna. Njengamanje i-Arrows neWits bahleli emaphuzwini angu-23 nawu-22 ngokwahlukana.
Egcina ukukhuluma neSolezwe umqeqeshi we-Arrows, uClinton Larsen, uthe asisekho isikhathi sokucasha ngesithupha kepha sekumele baqale baqoqe amaphuzu.
“Siwalahle kakhulu amaphuzu, ikakhulukazi ekhaya kodwa nakhona akukhona ukuthi asiwakhi amathuba. Sihlulwa ngamaphenathi namabhola ashaye kwabanye abadlali. Lo mdlalo usinika ithuba lokusondela lapho sifisa ukuqeda sikhona.”