Akabonwa nangalukhalo uTokelo Rantie muva nje
AKAZIWA ukuthi ukuziphi izinkalo umgadli weBafana Bafana, uTokelo Rantie.
URantie sekuphele isikhathi anyamalala eqenjini lakhe laseTurkey, iGenclerbigili. UFarook Khan, ofana noyise kuRantie kwazise ukhule ngaphansi kwakhe eStars of Africa Academy, utshele leli phephandaba ukuthi sengathi nemenenja yakhe ayimazi ukuthi ukuphi lo mgadli.
“Ngisanda kukhuluma nemenenja yakhe, uNadeem Mohammed nayo ithe isanda kukhuluma neqembu lakhe lathi alimazi ukuphi uRantie. Naye akamazi ukuthi ukuphi kwazise wahamba eqenjini lakhe engumuntu oya ekhaya. Kodwa ngicela uthinte uNadeem mhlawumbe usemtholile,“kusho uKhan.
Ngonyaka odlule uRantie wale waphetha ukuzodlala kwiBafana ethi ucela ukunikwa ikhefu kwelesizwe. URantie ubesephenduke umgadli omqoka kwiBafana ngenxa yamagoli akhe amqoka abewashayela elesizwe emidlalweni enzima. Lo mgadli, odabuka eFree State, ushaye igoli elimqoka ngonyaka odlule iBafana idlala neNigeria ngo 2-0 kowokuhlungela ukuzibekisela indawo kwi-Africa Cup of Nations (Afcon).
Nango-2014, uRantie uphinde wabamba elikhulu iqhaza iBafana izibekisela indawo kwi-Afcon ebiseEquatorial Guinea ngo-2015. URantie, ongaziwa ukuthi ukuphi, ufike eTurkey ekuqaleni kwesizini edlule esuka kwiBournemouth egijima kwi-English Premier League.
Uke wayibamba nakwi-Orlando Pirates ngesikhathi ikhala yemuka nesicoco se-Absa Premiership ngo-2011/2012.
Udlalile naseSweden kwiMalmo IF. Imizamo yokuthola uMohamed ukuthi aphawule ngokuduka kukaRantie igcine ingaphumelelanga.
Unyamalala nje iSouth African Football Association (Safa) isanda kudingisa unomphelo uThulani “Cream” Serero, ochizele iBafana ebizwa. Lo mdlali oyibamba eNetherlands watshela uStuart Baxter ukuthi uzoza ekhempini yeqembu lesizwe uma kuqinisekiswa ukuthi uzomdlalisa.