AmaBhakabhaka naMakhosi sebesekwa kwelikaBhanana
KWESINYE isikhathi abantu bangakini okade wabejwayela ukhula nabo, bagcina sebengasasiboni isimanga ngawe nezinto ozenzayo ngenxa yezizathu ezahlukene. Noma kukuhle osuke ukwenza kodwa uma sebejwayele ukuthi wenza leyo nto endaweni kuvele kube sengathi yinto vele okumele uyenze, akukhathelekile ukuthi usuke usiza nje kwesinye isikhathi.
Ayiphathwake indaba yokuthi ushintshe endleleni obewenza ngayo, ungabe usenza ngendlela abahlale beyilindele. Ubabona sebeme izixongololo bekhuluma ngawe ukuthi ngabe yini le eseyenza ukuthi obukwenza ungabe usazinikela kukona.
Ungathola ukuthi konke obukwenza bekuphuma ephaketheni lakho ngenhliziyo emhlophe. Kodwa abanqeni ukukuzonda ngokuthi awusakwenzi, bakhohlwe wukuthi kwasekuqaleni le nto yayisuke kuwena, engekho okucelile.
Uma izinto sezinjalo kumele ucabange ukuya kwenye indawo nosizo lwakho hleze bona bakuthakasele bawabonge amagalelo akho ‘omnikelo.’
Isimo engizokhuluma ngaso asifani nhlobo nomnikelo kodwa kukhona ukuhlobana kwesicefe esidalwa wukuthi vele kusuke sekunokujwayeleka ukuthi into ethile ikhona noma izokwenzeka.
Lapho ngiqonde khona yisemaqenjini athathwa ngokuthi makhulu eNingizimu Afrika i-Orlando Pirates neKaizer Chiefs. Hleze abaphathi, abadlali nabaqeqeshi bala maqembu sebebuye bazitshele ukuthi abalandeli bawo bazofika noma kanjani enkundleni ukuzowabuka, ikakhulukazi uma edlala ekhaya, kungakhathalekile ukuthi asuke edlala hlobo luni lwebhola ngaleso sikhathi. Lokhu kuyingozi kakhulu futhi abalandeli balezi zinkunzi zaseSoweto sebekhombise kaningi ukuthi abayingeni indaba yazo uma zidlala into abangayiqondi kahle.
Ngaphandle kwemidlalo lapho la maqembu esuke ebhekene womabili, asekuthola kunzima ukugcwalisa izinkundla zasekhaya uma edlala namanye amaqembu. Isibonelo nje wumdlalo wangeSonto lapho iChiefs ibibhekene neLamontville Golden Arrows koweNedbank Cup Last 32. Ubungalindela ukuthi iFNB Stadium igcwale phama ngoba bekungumdlalo obalulekile kodwa phinde, izihlalo yizona ebezibuka lo mdlalo njengoba bekunengcosana yabalandeli.
NakwiPirates sekuke kwenzeke lokhu e-Orlando Stadium. Abalandeli bavele bangazihluphi ngokuya enkundleni kungakhathalekile ukuthi leli qembu lisuke lidlala umdlalo osemqoka kanjani.
Ngeke nokho bagxekwe kakhulu abalandeli ngokubuye bawachizele la maqembu athathwa njengamakhulu ebholeni laseNingizimu Afrika ngoba abuye ashaye udaka ngendlela esezingeni eliphezulu. Kule sizini nje esiya ngasemaphethelweni angikhumbuli elilodwa lala maqembu liwina imidlalo emine ilandelana. Manje yini ngempela engaheha abalandeli ezinkundleni uma amaqembu amakhulu engenawo kanje umgqigqo?
Ngiyazi ngikubalulile ukuthi yiwona amaqembu okufanele ayibukisise kahle indlela adlala ngayo ukuze ahehe abalandeli. Kodwa nabo abalandeli kumele babuye bazibuze ukuthi ave sebekuthatha kancane yini ukuthi iPirates neChiefs ngamaqembu aseGoli ngakho bazoya ukuyowabuka ngelanga elithile uma kuthanda bona. Kuyisimo esihlukile nokho uma la maqembu efika eThekwini lapho engadlaleli khona imidlalo eminingi. IMoses Mabhida Stadium isho ukugcwala impela uma kufike elinye lala maqembu kungakhathalekile ukuthi lisuke lizodlala naMaZulu noma neLamontville Golden Arrows.
Ayiphathwake eyokuthi elinye lawo lizodlala umdlalo womkhumulajezi ngoba wonke umuntu usuke efuna ukuba seMabhida. Angilobi ngalokhu ngoba nakhu ngizinze kwelikaBhanana kodwa nabo abaphathi bePirates neChiefs bangakutshela ukuthi la maqembu aselandelwa kakhulu eThekwini namaphethelo, uma ungabalwa umdlalo wabakhaya lapho esuke ebhekene womabili.
Ngiyazi asisisodwa isizathu esenza ukuthi kube khona lolu shintsho endleleni abantu abaphuma ngayo ukuyobuka ibhola enkundleni eThekwini uma kuqhathaniswa naseGoli. Mhlawumbe ibhola elidlalwa yila maqembu alisafani nakuqala. Kungenzeka futhi ukuthi kukhona asebencamela ukubukela kwithelevishini kunokuya enkundleni abakuthatha njengenye yezindlela zokonga imali. Maningi futhi amathuba okuthi ukungaziwini izindebe kwala maqembu ngamasizini amabili adlule, kwehlise umdlandla wokuyozibonela wona enkundleni.
Nokho umbuzo omkhulu, uthi ngabe abalandeli baseThekwini bona abawabuki ngale ndlela la maqembu abo abawathandayo?
Sengike ngayizwa imvunge phambilini kukhona abakhala ngokuthi imidlalo eminingi yamanqamu ilethwa eThekweni kula masizini ambalwa adlule. Kunobufakazi obuphathekayo futhi kulokhu ngoba iNedbank Cup edlule idlalelwe eThekwini kanti neMTN 8 idlalelwe khona eThekwini.
Owamanqamu wokugcina weTelkom Knockout nawo udlalwe khona eThekwini.
Angikwazi ukuwuphendula umbuzo wokuthi yini eyenza kuthathwe izinqumo zokudlalela le midlalo yamanqamu eThekwini.
Nokho ngingakusho ngingananazi ukuthi abalandeli bebhola baseThekwini basaphuma ngobuningi babo uma kunemidlalo emikhulu bayoyibukela enkundleni.
Ngeke ngisho okufanayo ngabalandeli baseGoli ababukeka sengathi bakhathele ukuya ezinkundleni ngenxa yezizathu ezaziwa yibona. Angifuni ukuziqhatha nabo ngokuthi ngithi abasalifuni ibhola kodwa kubukeka sengathi yinto asebeyithatha kancane ukuthi amaqembu amakhulu azinze eGoli. Mhlawumbe yikho lokhu okwenza izikhulu zamaqembu zibone kufanele zishintshe umoya ziye eThekwini lapho abalandeli bengaphoxi khona. Ukuzinza endaweni eyodwa akusizi ngalutho uma bengasakuboni ukubaluleka kwakho.